தெற்கின் இலக்கியப் பொற்சித்திரம், பன்முகப் பெண் ஆளுமை வெலிகம ரிம்ஸா முஹம்மத்

தெற்கின் இலக்கியப் பொற்சித்திரம், பன்முகப் பெண் ஆளுமை வெலிகம ரிம்ஸா முஹம்மத்

கனல் கவி, கவிமணி அப்துல் றஸாக் சேகுதாவூத் 

கோட்டக் கல்விப் பணிப்பாளர் (ஓய்வு நிலை),

ஏறாவூர்.

தென் மாகாணம், மாத்தறை மாவட்டம், வெலிகம தேர்தல் தொகுதி வழங்கிய வியப்பிற்குரிய பெண்மணி, மாங்காய் வடிவ தேசத்தின் இலக்கிய மகோன்னதம் "வெலிகம ரிம்ஸா முஹம்மத்" அம்மணி அவர்களின் ஆற்றல்கள் ஆலமரமாய் விரித்து பரந்து இருக்க அறிமுகம் எதற்கு இந்த இலக்கியப் பெருந்தகையாளருக்கு என்பதே என் முடிவு.

பேராற்றல் நிறைந்த பெண்மையை - இலக்கியவாதி, எழுத்தாளர், கட்டுரையாளர், கவிஞர், சிறந்த நூல்கள் விமர்சகி, ஆய்வாளர், சிறுவர் படைப்பாளி, நேர்காணல்களிலோ நேர்த்தியானவர், பன்னூலாசிரியர், உன்னத ஊடகவியலாளினி, சஞ்சிகையாசிரியர், இலக்கியச் செயற்பாட்டாளர், சமூக ஆர்வலர் இப்படிப் பல முகங்களைக் கொண்டவரை எப்படி விழிப்பேன்? இத்தனை செயற்பாடுகளில் கோலோச்சும் இவரை, அத்துணை ஆற்றல் நிறை செயற்பாட்டுத் திறனாளியை எப்படி விழிப்பேன்? 

நான் சொல்வதெல்லாம் உண்மை, பொய்யுமில்லை, புனைவுமில்லை. தலைக்கனமில்லாத பல்லாளுமை, அனைத்துப் படைப்புகளிலும் இவரது சொல்லாளுமை கண்டு சொக்கிப் போனேன். சறுக்கல்களும் கிறுக்கல்களும் இல்லாத சுயம் கொண்ட சரிதங்கள், இயலுமையின் இயங்கு சக்தியினூடான இலக்கியத் தட(ய)ங்களும் சொற் செதுக்கல்களும், பல்லாளுமை வெளிப்பாடுகளும் இருபத்தியாறு வருடங்கள் கடந்தும் முடிவிலியாய்த் தொடர்கின்றது.

"வெலிகம ரிம்ஸா" என்ற பெண் குயில், சொந்தக் குரலிலும் பாடுகின்றது, வெலிகம கவிக்குயில், நிலாக்குயில், கவித் தென்றல், ஆர்.எம். ஆகிய புனைப் பெயர்களிலும் கூவுகின்றது. இவரது இலக்கியச் சிந்தனைகள், இவரது பாடுபொருள் கொண்ட கவிதைகள் இலங்கையில் என்றென்றும் பேசுபொருள்தான் என்பதில் ஐயமில்லை.

வெலிகம அறபா தேசிய பாடசாலை மற்றும் வரக்காப்பொல பாபுல் ஹஸன் மத்திய கல்லூரி ஆகியவற்றின் பழைய மாணவியான இவரது பாடசாலை ஆரம்பக் காலம் முதலே சூரிய, சக்தி அலைகளிலே (1998 இல்) ஆக்கங்கள் தவழ்ந்திருக்கின்றன. தினமுரசு வாரந்தரி கவி வரிகள் "நிர்மூலம்", (2004 இல்) மூலம் கொடுத்தது முதல் முகவரி. இன்று 300 கவிப் பாக்கள் தாண்டிப் பாடி நிற்கின்றது, மலையருவியாய்ப் பாய்ந்து கொட்டுகின்றது கவிதைப் பெருநதி.

ரிம்ஸா முஹம்மத் தனது படைப்புக்களுக்காக இணையத்தை சிறப்பாக பயன்படுத்தி வருகின்றார். அதிலும் குறிப்பாக தனது பல்வேறு வகையான படைப்புகளுக்காக வென்றே ஒவ்வொரு துறைக்குமாக வெவ்வேறு ஆறு புளக்ஸ்பொட் (வலைப் பூக்கள்) வைத்து மிகுந்த அர்ப்பணிப்போடு இயங்(க்)கிக் கொண்டிருக்கின்றார்.

பன்முக ஆளுமைவாதி ரிம்ஸா முஹம்மத் அவர்களின் அடைவுகளில் என்னால் ஆழ்ந்த பார்வைக்குள், பாடசாலைப் பாடநூல் எழுத்தாக்கக் குழுவில் இடம்பெற்றிருப்பதும், இஸ்லாமியப் பாட நூல் மொழிப் பதிப்பு மற்றும் ஒப்பு நோக்குதலிலும் பங்களிப்பு வழங்கியிருப்பதும் அகப்பட்டுக் கொண்டது என்பேன். இது ஒரு தேசியத்திற்கான பங்குபற்றல் அல்லவா. இவருடைய சில படைப்புகள் சிங்கள மொழியில் மொழிபெயர்க்கப்பட்டு, சிங்கள மொழி ஊடகங்களிலும் வெளிவந்துள்ளமை குறிப்பிடத்தக்கது. 

இவரது அடுத்த விசேட தன்மையாக என்னைக் கவர்ந்த விடயம், கல்வி ரீதியாகத் தன்னை மேம்படுத்திக் கொள்வதில் ஈடுபட்டுக் கணக்கீட்டுத் துறைக்குள் AAT, IAB கற்கைகளைப் பூரணப்படுத்திய அதேநேரம், அதே துறைக்குள் "வங்கிக் கணக்கிணக்கக் கூற்று" (2004), "கணக்கீட்டுச் சுருக்கம்" (2008), "கணக்கீட்டின் தெளிவு" (2009) ஆகிய மூன்று நூல்களை வெளியீடு செய்தது மட்டுமல்லாது "அடிப்படைக் கணக்கீடு" என்ற நூல் அச்சேறு நிலையில் உள்ளது என்று அறியக் கிடைக்கின்ற போது விழிகள் அகல ஆச்சரியப்படாமல் இருக்க முடியவில்லை. நானறிந்த வரையில் வேறு கணக்காளர்களோ, கணக்கியலாளர்களோ, கணக்காய்வாளர்களோ இவ்வாறு நான்கு நூல்களின் வெளியிட்டு எழுத்தர்களாக இருக்க முடியும் என்று நினைக்கவில்லை.

கற்கைகளைப் பூர்த்தி செய்வதில் பூரணாதியான இவர், கொழும்பு பல்கலைக்கழகத்தில் இதழியல்துறை டிப்ளோமா (2013) கற்கை நெறியினைப் பூர்த்தி செய்துள்ளார். பிரதான ஊடகப் பங்காற்றுபவராக இருந்து வருவதையும் அவதானிக்கலாம். இலங்கை ஒலிபரப்புக் கூட்டுத்தபான முஸ்லிம் சேவையில் ஒலிபரப்பப்பட்டு வந்த - மாதர் மஜ்லிஸ் நிகழ்ச்சிகளுக்கு பிரதிகளைத் தயாரித்தல், குரல் கொடுத்தல் (2004 - 2005 காலப்பகுதி), பிரபலமான தமிழ் ஊடகங்களில் கவிதை வாசிப்பு, கவியரங்கப் பங்கேற்பு என்று நீள்கையில், பதினேழுக்கு மேற்பட்ட இலங்கையின் பிரபலமான தேசிய முன்னோடி நாளிதழ்கள், வாரப் பத்திரிகைகள் என்பவற்றிலும், இருபத்து ஐந்துக்கும் மேற்பட்ட இலங்கை, இந்திய மற்றும் இணையவழி சஞ்சிகைகளிலும், இருபத்து ஆறைத் தாண்டியதான இணையத் தளங்களிலும், ஏழிற்கு மேற்பட்ட சர்வதேச வானொலிகளிலும் இவரது ஆக்கங்கள் மற்றும் இவருடனான நேர்காணல்கள் ஒலிபரப்பப்பட்டுள்ளன என்று வரலாற்று ரீதியான தடயப் பதிப்பை, தனது பெறுமான வீரியத்தை இமாலயச் சாதனையாக உயர்த்தி நிற்பதில் வேறு எவர் ஒருவரையும் என்னால் ஒப்பீட்டிற்கு நிறுத்த முடியவில்லை.

கவிதைகள், மெல்லிசைப் பாடல்கள், நூல் விமர்சனங்கள், சிறுவர் கதை, சிறுவர் பாடல், ஆவணம், கணக்கீடு என 14 நூல்களையும் வெளியீடு செய்து, மேலும் ஆறு நூல்களை வெளியீடு செய்யும் நிலையில் உள்ள படைப்பாளியை "சோர்விலாச் சொற்களின் சேயிழை" என அழைப்பதில் பொருத்தம் காண்கின்றேன். இவரது படைப்புகள் யாவுமே தனித்தனியாக வெவ்வேறு உட் பொருட்களைக் காட்டி நிற்கின்றன. பரிமாணங்கள் பலதாக, முக்காலப் பொருத்தக் கருத்தியலாக அவதானிக்க முடிகின்றது. பல்வேறு வகையான சிரமங்களுக்கு மத்தியிலும் இவர் பிரதம ஆசிரியராகச் செயற்பட்டு, 2010 ஆம் ஆண்டிலிருந்து காலாண்டிதழாக பூங்காவனம் கலை இலக்கிய சமூக சஞ்சிகையை, இவரது தோழி தியத்தலாவ எச்.எப். ரிஸ்னாவுடன் சேர்ந்து தொடர்ந்து வெளியிட்டிருக்கிறார். இதுவரை 38 இதழ்கள் வரை வெளிவந்த பூங்காவனம் இதழ்கள் இலக்கியச் சோலைக்குள் நறுமணம் பரப்பி நிற்கின்றது. இவர்கள் 12 வருடங்களாகத் தொடர்ந்து வெளியிட்டு வந்த பூங்காவனம் சஞ்சிகை பற்றிய ஆய்வை தென் கிழக்கு பல்கலைக்கழக மாணவியான சரிப்தீன் சரீபா பீவி (அநுராதபுரம்) தனது ஆய்வுக்காக எடுத்துக்கொண்டார். பின்னர் இந்த ஆய்வை "இலங்கைத் தமிழ்ச் சஞ்சிகை வரலாற்றில் 'பூங்காவனம்' (கலை இலக்கிய சமூக சஞ்சிகை) - ஒரு மதிப்பீடு" என்ற தலைப்பில் நூலாகவும் வெளியிட்டார். 

அதேபோல தென்கிழக்குப் பல்கலைக்கழக மாணவியான சுமையா சரீப்தீன் (தர்காநகர்) தமது பட்டப்படிப்பை பூரணப்படுத்துவதற்காக தென்னிலங்கைத் தமிழ்க் கவிதைகள் பற்றிய ஆய்வை மேற்கொண்டார். இந்த ஆய்வில் தென்னிலங்கைப் படைப்பாளியான ரிம்ஸா முஹம்மதின் கவிதைப் படைப்புகள் பற்றியும் சிறப்பாக நோக்கப்பட்டுள்ளது. சுமையா சரீப்தீன், தான் மேற்கொண்ட ஆய்வை "தென்னிலங்கைத் தமிழ்க் கவிதைகள்" என்ற தலைப்பில் 2021 இல் நூலாக வெளியீடு செய்துள்ளார். எனவே பல்கலைக்கழக மட்டத்திலும் இவருடைய இலக்கிய பங்களிப்புகள் கவனிப்பு பெற்றது என்பதில் மகிழ்ச்சியடையலாம்.

இதழ்கள், சிறப்பிதழ்கள், பத்திரிகைகள், எழுத்தாளர் அமைப்புகள் வெளியிட்ட நூல்கள், ஆய்வு நூல்கள், காற்றுவெளி இணைய இதழ், முத்துக்கமலம் இணையம், விக்கிப்பீடியா வலைத்தளம் என்பன இவரைப் பற்றி பல வகைமைக் குறிப்புகளையும், புகைப்படங்களையும் வெளியிட்டு கௌரவிப்புக் கொடுத்த பெருமை, கவிப் பெருந்தகையின் பேறாகும். அவைக்கும் பெருமையாகும். இலங்கையிலும், வெளிநாடுகளிலும் உள்ள இருபத்தைந்திற்கும் மேற்பட்ட அச்சு, இலத்திரனியல் ஊடகங்கள் இவரை நேர்காணல்கள் செய்துள்ளன. இதன்மூலம் இவரது ஆளுமை, ஆற்றல், நடத்தைசார் கோலங்களின் விருத்தியின் உயர்ச்சியை உணரலாம்.

ரிம்ஸா முஹம்மதின் படைப்புகளின் கருத்துப் பொதிவின் கனதிக்காகவும், வெளிப்படுத்தல் திறனுக்காகவும் பன்னிரண்டிற்கு மேற்பட்ட பிற அமைப்புகளின் தொகுப்பு நூல்கள் இவரது ஆக்கங்களை உள்வாங்கி வெளியீடு செய்திருப்பதன் அடிப்படையில் அந்த நூல்கள் பெருமை தேடிக் கொண்டுள்ளன என்றே கூற முடியும். இவரது ஒட்டுமொத்த இயங்காற்றல் திறன்களுக்காகவும், சான்றுப் பத்திரங்கள், பாராட்டுப் பத்திரங்கள், பண முடிப்புகள், பொன்னாடைகள் ஆகியவற்றுடன் சாமஸ்ரீ கலாபதி, காவிய பிரதீப (கவிச்சுடர்), கலாபிமானி, கலைமதி, கவித்தாரகை ஆகிய பட்டங்களையும், விருதுகளையும் மற்றும் மகளிர் விருது, வெற்றியாளர் விருது போன்றவற்றையும் இவர் பெற்றுள்ளார். மூத்த இலக்கிய ஆளுமையாளரான பன்னூலாசிரியர், கவிஞர் மூதூர் முகைதீன் (ஓய்வு பெற்ற அதிபர்) அவர்கள் தனது 08 ஆவது நூல் வெளியீடான "கனாக் கண்டேன்" எனும் இசைப் பாடல்கள் நூலை இவருக்கே சமர்ப்பணம் செய்துள்ளார். இது இவருக்குக் கிடைத்த விருதுகளையும் மிஞ்சிய கௌரவமாகும்.

நூல் வெளியீட்டு நிகழ்வுகளில் வாழ்த்துரைகள், நயவுரைகள், நூல் விமர்சனவுரைகள், நூல் ஆய்வுரைகள், சிறப்புரைகள், கருத்துரைகள், நினைவேந்தலுரைகள் என்பனவும் இவரது இலக்கிய இயங்கலுக்கும், துலங்கலுக்கும், புலமைக்கும் கிடைத்த சான்றுகளாகும்.

இந்த முற்போக்குப் பெண்ணியவாதியின் அமைப்பு ரீதியான அங்கத்துவம் பற்றி பேசுகின்றபோது பூங்காவனம் இலக்கிய வட்டத் தலைவராக செயற்படும் அதேவேளை, ஸ்ரீலங்கா முஸ்லிம் கலைஞர் முன்னணி, இலங்கை முற்போக்கு கலை இலக்கிய மன்றம், ஸ்ரீலங்கா முஸ்லிம் மீடியா போரம் என்பவற்றிலும் அங்கத்துவம் வகிக்கின்றார்.

தேசிய மற்றும் சர்வதேச ரீதியாக நடைபெற்ற கவிதை, சிறுகதைப் போட்டிகளில் பங்குபற்றி தனது படைப்புகளுக்காக பல பரிசில்களையும், பாராட்டுச் சான்றிதழ்களையும், பணப் பரிசுகளையும் இவர் பெற்றுள்ளார். இந்தியா, தமிழ்நாட்டைச் சேர்ந்த மறைந்த எழுத்தாளர், டாக்டர் ஹிமானா செய்யத் நினைவாக நன்னூல் பதிப்பகம் இணைந்து சர்வதேச ரீதியாக நடாத்திய சிறுகதைப் போட்டியில் இவர் இரண்டாம் பரிசு பெற்றுள்ளமையும் இங்கு குறிப்பிடத்தக்க விடயமாகும்.

இலக்கியச் சூரியன் ரிம்ஸா முஹம்மத் அவர்கள் தனது இருபத்தியாறு (1998 - 2024) வருடங்களைத் தொட்டுக் காட்டுகின்ற இலக்கிய அடையாளத்தின் ஆதராமாக இதுவரை பின்வரும் 14 நூல்களை வெளியிட்டுள்ளார். 

01. வங்கிக் கணக்கிணக்கக் கூற்று (கணக்கீடு) 2004

02. கணக்கீட்டுச் சுருக்கம் (கணக்கீடு) 2008 

03. கணக்கீட்டின் தெளிவு (கணக்கீடு) 2009 

04. தென்றலின் வேகம் (கவிதை) 2010 

05. ஆடம்பரக் கூடு (சிறுவர் கதை) 2012 

06. என்ன கொடுப்போம்? (சிறுவர் கதை) 2012 

07. பாடல் கேட்ட குமார் (சிறுவர் கதை) 2013 

08. இதுதான் சரியான வழி (சிறுவர் கதை) 2013 

09. கவிதைகளுடனான கைகுலுக்கல் ஒரு பார்வை (விமர்சனம்) 2013 

10. வண்ணாத்திப் பூச்சி (சிறுவர் பாடல்) 2014 

11. அறுவடைகள் (விமர்சனம்) 2015 

12. எரிந்த சிறகுகள் (கவிதை) 2015 

13. விடியல் (ஆய்வு) 2017 

14. எழுதாத பேனாவுக்கு எழுதிய சரித்திரம் (ஆவணம்) 2021 

இந்த 14 நூல்களுக்குள் "தென்றலின் வேகம்", "எரிந்த சிறகுகள்" என்ற தலைப்பில் அமைந்த இரண்டு கவிதைத் தொகுதிகளும் உள்ளடங்கும். இவ்விரண்டு கவிதைத் தொகுதிகளோடும் நான் உறவாடிய போது, காதல் உணர்வுகள் களி நடனம் புரிந்திருப்பதை உணர்ந்து கொண்டாலும், உலக வாழ்வியலாடு தொடர்புபட்ட பல அம்சங்கள் உள்ளடக்கப்பட்டிருப்பதும் உருவகப்படுத்தப்பட்டிருப்பதையும் உணராமல் போவேனா.

2010 ஆம் ஆண்டில் வெளிவந்த "தென்றலின் வேகம்" ரிம்ஸா முஹம்மத் அவர்களின் கன்னிக் கவிதைத் தொகுப்பாகும். தென்றலின் வேகம் என்ற அழகான இலக்கணப் பிழைக்குள் இதமான கவிதைகளைப் படைத்துத் தொகுத்துள்ளார் "கவித்தையல்" அவர்கள். தென்றலுக்கு வேகமில்லாவிட்டாலும் கவிதைகள் புயல் வேகம் கொண்டதுதானே.

"தென்றலின் வேகம்" கவிதை நூலில் பக்கம் 36 இல் இடம்பிடித்துள்ள புத்தகக் கருவூலம் அழகான சொல்லாட்சி நிறைந்த கவிதையாகும். நூலகம் ஒன்றைக் கருவூலத்திற்கு ஒப்பிட்டு, விஞ்ஞானமும் மெய்ஞ்ஞானமும்தான் உலகை ஆழ்கின்றது என்ற உண்மையை வரிகளால் விரிவடையச் செய்துள்ளார் கவிஞர். வித்தகக் கோட்டம், புத்தகத் தோட்டம் என்ற இவரது சொற் புலர்வு என்னை மிகவும் ஆட்கொண்டது. வித்தகம் என்பது கல்வி, கலைகள், ஞானம் அனைத்தையும் உள்ளடக்கியது. தோட்டம் என்பது பல பூவினம், பயிர்கள், செடிகள், கொடிகளின் வாழ்விடம். இவ்வாறானதுதான் "புத்தகக் கருவூலம்" என்கிறார் கவிஞர். இந்தச் சித்தரிப்பு அழகு தருகிறது.

விஞ்ஞானப் புதுமையும்

விண்ணுலகப் பெருமையும்

விளக்கும்

வித்தகக் கோட்டம் அது 

மெய்ஞ்ஞான்றும் விளக்கேற்றி

எல்லார்க்கும் ஒளியூட்டும்

புத்தகத் தோட்டமும் அது

பக்கம் 54 இல் "நியாயமா சொல்?" என்ற தலைப்பில் அழகான காதல் ரசம் சொட்டும் கவிதை ஒன்று இடம்பிடித்துள்ளது.

நியாயமா சொல் 

நியாயமாகச் சொல்

நிலவும் வானும் பள்ளி கொள்ளும் 

ஒரு அமாவசை நேரத்தில்

உன் நினைவுகள் துள்ளி வந்து

கொள்ளை இன்பம் தந்து

என் நித்திரையைக் கெடுப்பது

என்ன நியாயம்?

"நிலவும் வானும் பள்ளி கொள்ளும் ஒரு அமாவாசை நேரத்தில்" மிதமிஞ்சிய கற்பனை இரசனை இந்த வரிகளுக்குள் ஒழிந்திருக்கிறது. ஆம் பள்ளி கொள்கையில் இருளாய் இடம் இருப்பதுதானே நியதி. அதுதான் அமாவாசை நேரமாக இருக்கின்றதோ, பள்ளி நேர எண்ணங்களோடு என்பதும் இதற்குள் உறங்குகின்றது. நினைவுகள் எப்போதும் நித்திரையைக் கெடுப்பதுதான் அதன் கடமை, நித்திரை கெட்டாலும் சுகம் சுகமே, வரிகளில் நிழலாடுகிறது அதன் இன்பம். தீராத தாகம் தந்து நித்திரையைக் கெடுக்கின்றாய், விரக தாபம் தீர்க்காமல் தவிக்கவிட்டுச் செல்கின்றாய், எண்ணத்தில் தேன் வார்த்து எட்டியெட்டிச் செல்கின்றாயே என்ன நியாயம்? நியாயமா சொல் என்ற கவிஞரின் கேள்வி நியாயமானதுதானே. இக்கவிதையிலே உடல் உள உணர்ச்சி, பிழம்பாக எரிமலைக் குழம்பாக வடிகின்றது. காதல் வதை இதுதானோ? காதலன் வந்தால் வதைத்தேனாய் வளியுமோ? காதல் ரசம் அருமை அருமை.

பக்கம் 59 இல் இடம்பிடித்துள்ள "புயலாடும் பெண்மை" என்ற கவிதையில் பெண்மையின் குணாம்சங்களைக் குண நலனாகச் சொன்ன கவித்தகை அவர்கள் அடக்கியொடுக்க நினைத்தால் அடலேறாவாள். பெண்ணுக்கு அநீதி என்ற போது திண்ணிய நெஞ்சினளாய் நின்று எதிர்ப்பாள் என்று பெண்மையின் மென்மைக்குள் வன்மையும் உண்டென்று பெண்மைக்கு ஆக்ரோசம் ஊட்டுகின்றார்.

பெண்ணே நீ பாவலர் பேற்றும் 

மென்மையாவைள்தான்

ஆனால் அடக்கியொடுக்கி 

வாழ நினைக்கும் 

ஆடவர் மத்தியில்

அடல் சான்ற 

வன்மையானவள்

பக்கம் 80 இல் இடம்பெற்றுள்ள "வானும் உனக்கு வசமாகும்" என்ற கவிதையில் இளைஞர்களுக்கான விழித்தெழும் விடியலுக்கான அழைப்பை விடுக்கின்றார் கவிஞை. பாவலர் எழுச்சிமிகும் வரிகளுடே முடக்காதே இயங்கு, துணிவே துணை, புறப்படு காரியமாற்று, தடையுடை, கடினம் கணக்கிற் கொள்ளாதே, நம்பிக்கையை நம்பு போன்ற நம்பிக்கை வரிகளால் தும்பிக்கை ஊக்கியாக வழங்கியிருக்கின்றார்.

2015 இல் வெளிவந்த "எரிந்த சிறகுகள்" என்ற கவிதைத் தொகுதி இவருடைய இரண்டாவது கவிதைத் தொகுதியாக அமைகின்றது. இந்தக் கவிதைத் தொகுதியில் பக்கம் 35 இடம்பிடித்துள்ள 'என்ன வாழ்க்கை' என்ற கவிதையை உரசியபோது தலைப்பிலேயே ஒரு உளச் சலிப்பு கவிஞரால் உணர்வூட்டம் செய்யப்பட்டுள்ளது.

செழிப்புடன் வாழ்ந்தோர் முகத்திலே

பட்டினித்துயர்தான் படிகிறதே

சூழ்ந்தது துன்பம் எமைச்சுற்றி

சுகமது உண்டோ வாழ்க்கையிலே

துன்பம் சுற்றியிருக்க எப்படி வாழ்க்கையில் சுகம் உண்டாகும் என்ற யதார்த்தமான கேள்வியை எழுப்புகின்ற போது, "முதியோர் இல்லத்தில் விழ்ந்ததால்" என்று கவிதை பதில் தருகின்றது. செழிப்பாக வாழ்ந்தவர் நிலை, இன்று முதியோர் இல்லத்தில் அவல நிலையாகிவிட்டது என்கிறார் கவிஞர். முதியோர் இல்லத்தில் தங்கள் உறவுகளைத் தள்ளிவிடும் உறவுகளின் உணர்தலுக்கு சிறந்த கவிதை இது. சகதிநிலை - அகதிநிலை, வாழ்கின்றோம் - வீழ்கின்றோம், அழிகிறதே - கழிகிறதே இவற்றில் சந்தம் சிந்து பாடுகின்றது.

அடுத்து பக்கம் 38 இலுள்ள "ஒப்பனைகள்" என்ற கவிதை மனிதர்களில் பெரும்பாலானோர் அரிதாரம் பூசிய நடிகர்கள், முகமூடியை முகமாய் அணிந்தவர்கள் - இவர்களின் சொல், செயல், நடத்தை அனைத்துமே ஒப்பனைதான் எனச் சாடியுள்ள அதேநேரம், வரிகளை முரண்களாகவும் வடிவமைத்துள்ளார் கவிதாயினி.

அவர்களின் முகத்திற்கும் அகத்திற்கும் 

சம்பந்தமேயில்லாத பின் 

ஒப்பனைகள் மட்டும் எதற்கு 

அகற்றிவிடட்டும் 

அடுத்து பக்கம் 42 இலுள்ள "சங்கீதமிசைக்கும் சமாதானப் புறா" என்ற கவிதையின் வரிகள் மூலம் யுத்தகால நிலையை நேரடியாகக் கண் முன்னே கொண்டுவரும் கவிஞர், யுத்தமற்ற தற்போதைய சூழலையும் எடுத்தியம்புகின்றார். 

அண்ணாந்து பார்த்தேன் 

அழுதபடி காட்சியளித்தது 

அகல விரிந்த வானம்

உயிர் பிழைத்த

அந்த சம்பவங்கள்

தற்போது இல்லாமல்

சங்கீதமிசைக்கிறது

சமாதானப் புறா

யுத்தக் கொடுமை கண்டு அகல விரிந்த வானம் அழுதது எனக் கூறும் கவிஞரின் வரிகளில் நயம் சுவைக்கின்றது. உயிர் பிழைத்த என்ற சொல்லில் இருபொருள் புதைந்து கிடக்கின்றது. உயிர் பிழையாகிப் போனால் அது மரணம் என்பது ஒரு பொருள். உயிர்கள் இன்று ஆபத்தில்லாமல் மரணம் இல்லாமல் பிழைத்திருக்கின்றது என்பது மறுபொருளாகும்.

எமது தேசத்தின் தனிப்பெரும் இலக்கிய முதுசமாக, கனதியான அத்தியாயமாக ரிம்ஸா முஹம்மத் அவர்களை நான் பார்க்கின்றேன். இவரது படைப்புகளையும், செயற்பாடுகளையும் விழுமியங்களும், மனப்பாங்கு விருத்தியும் கொண்ட எதிர்கால சமூக மாற்றத்தின் தூண்களாக அடையாளப்படுத்த முடியும் என்பது எனது நோக்கு. இவரை ஒட்டு மொத்தமாக வரையறைப்படுத்தும் போது, கூர் அவதானம், கூர் புத்தி, படைப்பியல் நுட்பத்திறன், ஆற்றல், அறிவு, அனுமானம், அனுபவம், மனப்பாங்கு, உள் வாங்கல் திறன், மனமுதிர்ச்சி என்பனவே இவரது தனியாள் விருத்தியை சிறப்பாக அமைக்க வழிச(ய)மைத்துக் கொடுத்துள்ளது கண்கூடு என்பதை ஏகமனதாக ஏற்கின்றேன். இவரைத்தேடி அடைபவர்கள் பல்துறை தேர்ச்சி அடைவர், அடையாளம் பெறுவர் என்பதும் திண்ணமாய் எனது எண்ணம்.

கவிதை எனப்படும் போது மரபுகள் தவிர்ந்த அனைத்தும் கற்றுக்கொள்வதோ, தெளிவுறுவதோ அல்ல அது உள்ளத்தினூடான உந்துதலின் ஊற்று எனச் சொல்வேன். ரிம்ஸா முஹம்மத் அவர்களின் கவிதைகள், மெல்லிசைப் பாடல்கள், சிறுவர் கதைகள், சிறுவர் பாடல்கள், நூல் விமர்சனங்கள், ஆய்வுகள் என்பன தொகுப்பாக்கம் பெற்றிருப்பதை இலேசுபட்ட காரியமாகப் பார்க்க முடியாதது. ரிம்ஸா முஹம்மத் அவர்கள் எமது புதிய தலைமுறைக்கும் வருங்கால சந்ததிக்கும், இலக்கியத் தடங்களைத் தடாகங்களாகக் கையளித்துள்ளார்.

உளவியல், சமூகப் பொருளாதாரம் போக்குகள், காதல், உளப்போராட்ட உணர்வுகள், அரசியல், பண்பாட்டுக் கோலங்கள், ஆன்மீகம் என்று பிரித்துப் பார்ப்பதைவிட இவரது ஆக்கங்களை உலக வாழ்வியல் சார் நடைமுறைக்குள் உள்ளடக்கப்பட்டவையாகவே என்னால் பார்க்க முடிகிறது. இவரது இலக்கிய ஆக்கவியல்களும், கவிதைகளும் பிரபஞ்சப் பரப்பாக, பதிவுகள் யாவும் ஆழமானவை, பெறுமதியானவை, பெருமைக்குரியவை.

இவரது படைப்புகள் சுவாசிப்பதற்கான மூச்சுக் காற்றின் பெறுமானம் கொண்டவை. உணரவும் அனுபவிக்கவும், பார்க்கவும் மற்றையவர்களோடு பகிரவும் பாத்தியதை உடையதான இவரது ஆன்மாவின் வெளிப்படுத்தல்கள், தமிழ் பேசும் ஒவ்வொரு வீடுகளிலும் இருக்க வேண்டிய தொகுப்புகளாகும். இவரது துறைசார் பங்களிப்புகள் யாவும் வானுயர வளர்ந்து நிற்கின்றது. வானளாவ வளர விரும்புவோருக்கு இவை வரப்பிரசாதமாகும். 

சமூக அவலங்களையும் ஆற்றாமைகளையும் தனக்குள்ளேயே அடக்கி வைத்திராது சீறும் சிங்கப் பெண்ணாக மிடுக்கான சொல்லடுக்குகளுடன் தனது படைப்புகள் மூலம் வெளிப்படுத்தியிருக்கிறார். மட்டுமல்ல இலேசாக வளைந்து கொடுக்கவோ, வளைத்தெடுக்கவோ பல்லாயிரம் பாகைகள் வெப்பநிலையில் உருக்கினாலும் உருக மாட்டேன் என்ற எண்ணம் கொண்ட இரும்புப் பெண்ணாகவே இவரது படைப்புகளின் பல அம்சங்கள் வெளிக்காட்டி நிற்கின்றன. பிறப்பிலேயே போராட்டக் குணத்தினையே மெய் முழுக்க சுமந்தவராக இருப்பதை இவரோடு பேசும்போது என்னால் புரிந்துகொள்ள முடிந்தது கண்டு இந்தக் கவிதாயினியை நினைத்து நான் விக்கித்து நின்றேன். 

இலங்கைப் பெண்கள் சமூகம், இப்பெண் பல்லாளுமையை அழகிய முன்மாதிரியாகக் கொள்ள முடியும். இலங்கையின் உயர் ஆளுமை கொண்ட ஒற்றைப் பெண்ணாகப் பேசப்படும் காலம் தொட்டுவிடும் தூரத்தில்தான் என்பதில் ஐயமில்லை. சர்வ எழுத்து இயங்கியல் பெண்மையே உங்களது கடமை மேலும், மேலும் பெயரையும் பெருமையையும் தேடித் தரும் செயல்களில் அர்ப்பணிப்பதுதான், இளைப்பாறுவதல்ல. எங்கள் பிள்ளைகள், பேரன், பேத்திகளுக்கே உங்கள் நவீன உயர்ந்த இலக்கியத்தைப் பரிசளிப்பீர்களாக, இந்த வனிதையை வாழ்த்த என்னிடம் வார்த்தைகள் இல்லாத போதும் உள்ளதைக் கொண்டு வாழ்த்துரைத்துள்ளேன். வாழ்க, வளர்க, வழிகாட்டுக!!!

இவருடனான தொடர்புகளுக்கு:-

Face Book - Rimza Mohamed

Telephone - 0775009222

Email - rimza.mohamed100@gmail.com

 

ஆக்கம்:-

கனல் கவி, கவிமணி அப்துல் றஸாக் சேகுதாவூத் 

கோட்டக் கல்விப் பணிப்பாளர் (ஓய்வு நிலை),

ஏறாவூர்.

இந்தச் சஞ்சிகையில் 66 ஆம் பக்கத்தில் வெளிவந்துள்ள எனது கவிதையொன்றை வாசகர்களின் இரசனைக்காக இங்கே பதிவேற்றுகின்றேன்.

நன்றிகள்:-

வெண்ணிலா சஞ்சிகை இதழாசிரியர்

வெலிகம ரிம்ஸா முஹம்மதின் "விடியல்" ஆய்வு நூல் ஓர் எளிய மதிப்பீடு

வெலிகம ரிம்ஸா முஹம்மதின் "விடியல்" ஆய்வு நூல் ஓர் எளிய மதிப்பீடு

நூல் மதிப்பீடு:- சிறீ சிறீஸ்கந்தராசா

வெலிகம ரிம்ஸா முஹம்மத் கொழும்பு பல்கலைக்கழகத்தில் இதழியல் துறைக் கற்கை நெறிக்காக ஆய்வு ஒன்றைச் செய்தார். அந்த ஆய்வை ஒரு சில மாற்றங்களோடு "விடியல்" என்ற பெயரில் நூலாக வெளியிட்டார். இந்த விடியல் என்ற நூலினையே இங்கே ஓர் எளிய மதிப்பீட்டிற்காக நான் எடுத்துக்கொள்கின்றேன். ஏனைய இலக்கிய வடிவங்களைப் போன்று ஆய்வுத் துறையானது தொடக்கம், வளர்ச்சி, உச்ச கட்டம், முடிவு போன்ற வளர்ச்சிப் படிமுறைகளைக் கொண்டதல்ல.

ஆய்வின் நோக்கம், ஆய்வின் பொருள், முன்னர் ஆய்வு செய்யப்பட்டதா? அப்படியாயின் மீள் ஆய்வு  செய்யப்பட வேண்டியதன் அவசியம் என்ன? இத்தகைய ஆய்வின் மூலம் சொல்ல வரும் செய்தி என்ன? போன்ற பல விடயங்களை உள்ளடக்கியதாக ஒரு ஆய்வு இருக்க வேண்டும். ரிம்ஸா முஹம்மத் இளம் ஆய்வாளர், கவிஞர், பன்னூலாசிரியர், சஞ்சிகையாசிரியர், ஊடகவியலாளர் என்ற வகையில் மூத்த எழுத்தாளர் மூதூர் முகைதீனின் கவிதைகளைத் தனது ஆய்வுக்கு எடுத்துக்கொண்டிருக்கிறார்.

நூலாசிரியர் ரிம்ஸா முஹம்மத், முதலாவது அத்தியாயத்தில், கவிதை பற்றிய அறிமுகத்தைத் தந்துவிட்டு தான் எடுத்துகொண்ட ஆய்வின் பிரச்சனைகள், ஆய்வின் வரையறை, உள்ளடக்கம் பற்றிக் கூறுகின்றார்.  இரண்டாவது அத்தியாயத்தில் கவிதையின் வரைவிலக்கணம், கவிதையின் வகைகள், மரபுக் கவிதைகள் நவீன கவிதைகள் பற்றியும் பேசுகிறார். மூன்றாவது அத்தியாயத்தில் கவிஞர் மூதூர் முகைதீன் அவர்களின் கவிதைத் தொகுப்புகள், அவர் பெற்ற விருதுகள், பரிசில்கள், கௌரவங்கள் பற்றி மிகச் சிறப்பான முறையில் எழுதிச் செல்லுகிறார். நான்காவது அத்தியாயத்தில் "பிட்டும் தேங்காய்ப் பூவும்", "இழந்துவிட்ட இன்பங்கள்", "ஒரு காலம் இருந்தது" ஆகிய 03 கவிதைத் தொகுதிகளிலுள்ள கவிதைகள் பற்றியும் மிகவும் சிறப்பான எடுத்துக் காட்டுகளோடு பதிவு செய்து விளக்குகிறார். ஐந்தாவது அத்தியாயத்தில் கவிதைகளின் சமூக கலாசார பங்களிப்புகள் பற்றியும், வாசகர்கள் மத்தியில் கவிதை நூல்களுக்கான வரவேற்புப் பற்றியும் தனக்கே உரித்தான பாணியில் கூறுகிறார்.

கவிதை பற்றிய அறிமுகத்தின் போது, "கவிதை என்பது ஆழ்மனதில் புதைந்திருக்கும் வலிகளை, சந்தோசங்களை, ஏமாற்றங்களை, தவிப்புக்களை எல்லாம் வெளிக்கொணரும் ஒரு ஊடகம்" என்று கவிதைக்கு புதியதொரு இலக்கணம் வகுக்கின்றார். காலத்திற்கு ஏற்ப பொருள் புதைந்த இலக்கணம் ஒன்றை ரிம்ஸா முஹம்மத் இங்கே பதிவு செய்துள்ளார். பாராட்டுக்கள். யாப்பிலக்கணம் மட்டும் தெரிந்தவர்களிடம் இருந்த கவிதை காலவோட்டத்தில் எளிதான முறையில் எல்லோரிடமும் மரபை மீறிய கவிதைகள் என்ற வடிவத்தில் வந்து சேர்ந்துள்ளன எனப் பெருமையுடன் கூறுகிறார். போர் கிழித்த தேசம் தான் சுமக்கும் வலிகள் வேதனைகள், உளவியல், உடலியல் தாக்கங்கள் அதனால் இனங்களுக்கு இடையில் ஏற்பட்ட முரண்பாடுகள் பற்றிப் பேசும் கவிஞர் முகைதீனின் கவிதைகள் பற்றி மிகவும் யதார்த்தமான முறையில் ஆய்வு செய்கிறார்.

கவிதையின் வகைகள் என்ற பகுதியில் தலித் கவிதைகள், பெண்ணியக் கவிதைகள், பின் நவீனத்துவம், ஹைக்கூ, என்று வகைப்படுத்துகின்றார். கவிஞர் மூதூர் முகைதீன் அவர்களின் மூன்று கவிதைத் தொகுப்புகளை வெலிகம ரிம்ஸா முஹம்மத் இங்கே ஆய்வுக்கு எடுத்துக்கொண்டிருக்கிறார். கவிஞர் மூதூர் முகைதீன் அவர்கள் சுமார் மூன்று தசாப்பதங்களாக இலக்கிய ஈடுபாடு கொண்டு, தமிழ்த் தொண்டு ஆற்றிவருகிறார். கிழக்கின் முன்னணிக் கவிஞர்களுள் ஒருவராகவும், தனது ஊரின் பெயரை முன்னிறுத்தி "மூதூர் முகைதீன்" என்று புனைபெயர் கொண்டு தொடர்ந்தும் எழுதி வருகிறார். இவரது இயற்பெயர் ஏ.எம். முகைதீன் ஆகும். இதுவரை இவர் மூன்று கவிதைத் தொகுப்புக்களை வெளியீடு செய்துள்ளார். "பிட்டும் தேங்காய்ப்பூவும்", "இழந்துவிட்ட இன்பங்கள்", "ஒரு காலம் இருந்தது" என்பனவே அவையாகும்.

"பிட்டும் தேங்காய்ப்பூவும்" என்ற தொகுப்பிலுள்ள கவிதைகள் சிலவற்றை எடுத்துக் காட்டுக்களாகப் பதிவு செய்து தனது ஆய்வினை மேற்கொள்ளுகின்றார். யுத்தம் தந்த துன்பங்கள், துயரங்கள், வலிகள், வேதனைகள், எல்லோரையும் பாதித்திருக்கின்றது என்பதை இவரது கவிதைகள் தாங்கி நிற்கின்றன. ரிம்ஸா முஹம்மத் அவர்களின் நடையில் சொல்லவேண்டுமாயின் "எங்கு பார்த்தாலும் பிணங்களும் மண்டை ஓடுகளும், அந்த இருண்ட காலத்தை எம் கண் முன்னே காட்சிப்படுத்துகின்றார். புராதன பொருட்களை அகழ்ந்து ஆராய்ச்சி செய்வது போல இனி மண்டை ஓடுகளைத்தான் ஆராய்ச்சி செய்ய வேண்டுமெனச் சாடி நிற்கின்றார்". இந்தத் தொகுப்பிலுள்ள ஒரு உணர்வுமிக்க கவிதை ஒன்றினை இனம் காட்டுகின்றார்.

நோன்புக் கஞ்சியை 

விரும்பிச் சுவைத்திட 

மாலைப் பொழுதில் 

உரிமையுடன்

உம்மாவிடம் கேட்டு வாங்கி 

உறுஞ்சிக் குடிக்கும் 

விஜயன் விமலன் 

நட்பு மலர்கள் 

தினமும் மணக்கும்

பிள்ளையார் கோவிலில் 

சிவராத்திரிக்கு 

சின்னராசாவின் பக்கத்தில் 

அன்வர் இருந்து 

மோதகம் உண்பான்

ஐயர் வந்து 

சிரித்தபடியே

அவித்த கடலையையும் 

அள்ளிக் கொடுப்பார்.. 

இந்த வரிகள் யுத்தத்துக்கு முன்பு இனங்களுக்கிடையே காணப்பட்ட ஒற்றுமையினதும், அன்பினதும் அப்பட்டமாக எடுத்துக் காட்டுகின்றது. இவ்வாறு தனது யதார்த்தமான, அரிதாரம் ஏதும் பூசாத வரிகளால்  பதிவு செய்து போகின்றார். உண்மையில் கவிஞரின் ஆளுமையும், ஆய்வாளரின் சொல்லாட்சி எழுத்தாற்றலும் இக்கவிதைக்கு மேலும் மெருகூட்டுகின்றது.

"இழந்துவிட்ட இன்பங்கள்" என்ற தொகுப்பிலிருந்து ஆய்வாளர் எடுத்துக் காட்டும் சிறப்பான கவிதை ஒன்றினை இங்கே பார்ப்போம்.

பொன்னகராம் நான் வாழும் பதியம் இன்று 

பொலிவிழந்து போனதுவோ போரால் வெந்து 

கண் போன்று காத்திட்ட கல்விக்கூடம்

கலையிழந்து காட்சிதரும் கோலம் கண்டு 

கண்ணீரை விட்டும் நான் கவலை கொண்டு

கரந்திட்ட காலத்தைக் கனவாய்ப் பார்த்தே

எண்ணாத எண்ணமெல்லாம் எண்ணி நெஞ்சில் 

ஏக்கத்தில் வாழுகின்றேன் இன்னும் மண்ணில்

போரின் கோர முகத்தை கவிஞர் மேலுள்ள கவிதை மூலம் மிகவும் அற்புதமாகப் படம்பிடித்துள்ளார்.

"ஒரு காலம் இருந்தது" என்னும் கவிதைத் தொகுப்பிலுள்ள இன்னொரு அற்புதமான கவிதையை அது காட்டும் அன்பின் பிணைப்புகளையும், இனங்களின் ஒற்றுமைகளையும் கவிஞர் வெளிப்பூச்சு ஏதுமின்றிப் இப்படி பதிவு செய்துள்ளார். கவிஞருக்கு வாழ்த்துக்கள். இந்தக் கவிதையை இனம் காட்டிய ஆய்வாளருக்கு எமது சிறப்பான பாராட்டுக்கள்.

ஒரு காலம் இருந்தது

அந்திப்பொழுது உச்சம் கொடுக்க 

ஆலய மணி ஓசையில் 

அரிசி உலை வைப்பதற்காய் 

ஆயிசா உம்மா

அவசரப்படுவதும்..

அதிகாலை

பாங்கொலியில்

அன்னம்மா எழுந்து 

புகையிலைத் தோட்டத்திற்கு

புறப்பட்டுப் போவதுமாய் 

ஒருவர் வழியில் 

இருவரும் இணைந்தே 

வரையப்பட்ட விதி வழியாய்

வாழ்ந்த

ஒரு காலம் இருந்தது..

இத்தகைய மூன்று தொகுப்புகளிலிருந்தும் தனக்கே உரித்தான பாணியில் கவிதைகளை எடுத்துக்காட்டி தனது ஆய்வினை மிகவும் சாத்தியமான முறையில் வெற்றிகரமாக நகர்த்திச் சென்ற ரிம்ஸா முஹம்மத் அவர்களின் ஆளுமையும் ஆற்றலும் கண்டு நாம் இங்கேவியந்து நிற்கின்றோம். இந்த உணர்ச்சிக் கவிஞர் மூதூர் முகைதீன் அவர்களின் இந்த மூன்று தொகுப்புகளையும் படிக்க வேண்டுமென்ற ஆவலினைத் தூண்டிய ஆய்வாளர் வெலிகம ரிம்ஸா முஹம்மத் அவர்களுக்கு எமது சிறப்பான வாழ்த்துக்களையும் பாராட்டுக்களையும் வழங்குவதில் நாம் பெருமைகொள்கிறோம்.

நூல் :- விடியல்

நூல் வகை :- ஆய்வு

நூலாசிரியர் :- ரிம்ஸா முஹம்மத்

தொலைபேசி :- 0775009222

மின்னஞ்சல் :-  rimza.mohamed100@gmail.com

விலை :- 400 ரூபாய்

நூல் மதிப்பீடு:-  சிறீ சிறீஸ்கந்தராசா

எரிந்த சிறகுகள் கவிதைத் தொகுதி பற்றிய கண்ணோட்டம்

எரிந்த சிறகுகள் கவிதைத் தொகுதி பற்றிய கண்ணோட்டம்

பதுளை ஹுமைரா அல் அமீன் 

இன்றைய நாட்களில் இலக்கிய உலகினால் நன்கு அறியப்பட்ட ஒருவராகவே வெலிகம ரிம்ஸா முஹம்மத் காணப்படுகிறார். பூங்காவனம் கலை இலக்கிய சஞ்சிகையின் பிரதம ஆசிரியராகவும் வாசகர்கள் மத்தியில் நன்கு பரிட்சயமானவர். மாத்தறை மாவட்டத்தில் அமைந்துள்ள வெலிகமயைப் பிறப்பிடமாகக் கொண்ட  இவர், ஓர் எழுத்தாளராகவும் கவிஞராகவும் மிளிர்கிறார். வெலிகம ரிம்ஸா முஹம்மத் என்ற பெயரில் இவரது பரவலான ஆக்கங்களை ஊடகங்களில் களப்படுத்தி வந்தாலும் வெலிகம கவிக்குயில், வெலிகம நிலாக்குயில், ஆர்.எம். ஆகிய புனைப் பெயர்களிலும் இவர் தனது ஒரு சில ஆக்கங்களை எழுதியுள்ளார்.  1998 ஆம் ஆண்டிலிருந்து தொடர்ந்தும் எழுதிவரும் இவருடனான நேர்காணல்கள் தேசிய ஊடகங்களில் மட்டுமல்லாமல் சர்வதேச ஊடகங்களிலும் வெளிவந்துள்ளன அத்துடன் ஒலி,ஒளிபரப்புச் செய்யப்பட்டுள்ளன. இதுவரை 14 நூல்களை வெளியிட்டு இவர் இலக்கியத் துறைக்குப் பெரும் பங்காற்றியுள்ளார். அத்துடன் ஊடகத் துறையில் இவருக்குள்ள ஆர்வம் காரணமாக 2013 இல் கொழும்பு பல்கலைக்கழகத்தில் இதழியல் டிப்ளோமா கற்கை நெறியையும் பூரணப்படுத்தியுள்ளார்.

இளவயதிலேயே தன் தாயாரை இழந்து குடும்பம் எனும் சுமையை தன் முதுகில் ஏந்திக்கொண்டு கத்தி மேலே நத்தையாக நடந்து வந்த ஒரு பெண்ணின் வாழ்க்கை அனுபவங்கள், மனத்துயரங்கள் எப்படியிருக்கும் என்பதை வார்த்தைகளால் வரையறை செய்துவிட முடியாது. அந்த அனுபவங்களை மொழியாக்கி, உயிர் கொடுத்து கவிதைகளின் மூலம் தனது உள்ளக் குமுறல்களை வெளிப்படுத்தி சற்று ஆறுதலடைகிறார் சகோதரி ரிம்ஸா முஹம்மத்.  

தென்றலின் வேகம் என்ற கவிதை நூலை 2010 இல் வெளியிட்டு இலக்கிய உலகைத் திரும்பிப் பார்க்க வைத்த இவர், எரிந்த சிறகுகள் என்ற கவிதைத் தொகுதியையும் வெளியீடு செய்துள்ளார். 152 பக்கங்களில் வெளிவந்துள்ள இந்த எரிந்த சிறகுகள் கவிதை நூலில் பல்வேறு தலைப்புக்களில் அமைந்துள்ள 54 கவிதைகளும் 07 மெல்லிசைப் பாடல்களும் இடம்பிடித்துள்ளன.

"எரிந்த சிறகுகள்" கவிதைத் தொகுதியில் உள்ள கவிதைச் சிறகுகளை நான் மெதுமெதுவாகப் பிரித்துப் படிக்க ஆரம்பித்தேன். அந்த எரிந்துபோன இறகுகளின் பல இடங்களில் காயங்கள், கொஞ்சம் கண்ணீர், வலிகள், வேதனைகள் என்று அத்தனைக்கும் தனக்குத் தானே மருந்திட்டுக் கொண்டு பறந்துவிட்ட ஒரு குருவியின் குதூகலம் அந்தக் கவிதைகளில் தெரிகிறது. இவருடைய அர்த்தமுள்ள அந்த வரிகளுக்குள் ஆயிரம் பாடங்களைக் கண்டுகொள்ள முடிகிறது.   

அன்பு, காதல், நட்பு, போராட்டம், ஏமாற்றம், முரண்பாடுகள் இன்னும் எத்தனையோ என்று வாழ்வின் அத்தனை உணர்வுகளையும் இவர் கவிதைகளின் சிறகுகள் சுமந்து செல்கின்றன. சில வரிகள் அப்படியே உள்ளத்தில் புதைந்து கொண்டன. மனதில் ஆழமாகப் பதிந்து கொண்டன. வலிகளின் வரிகளுக்குள் தலை தடவும் ஆறுதலும் அவருக்கு அவராகவே ஒத்தடம் கொடுத்துக் கொள்கின்றது.

வாழ்க்கைப் பூங்காற்று (பக்கம் 28) என்ற தலைப்பில் அமைந்த கவிதையிலுள்ள பின்வரும் வரிகள் எத்தனை அருமையாக அமைந்துள்ளன. தன் வாழ்வில் அனுபவித்த கஷ்டங்களை பாறைகளாகப் பார்க்கிறது கவிஞரின் மென்மையான மனது. துன்பங்களோடு போராடினாலும் உள் மனதில் எங்கோ ஒரு மகிழ்ச்சி, தைரியம், நம்பிக்கை இருப்பதை உணர்த்துவதாய் அழகாகச் சொல்கிறது அந்தக் கவிதையின் வரிகள். கூடவே வாசிக்கும் போது ஓர் எதிர்ப்பார்ப்பும் தன்னம்பிக்கையும் எம்மைத் தழுவிக்கொள்கிறது.

பாறைகளுடன் நான்

சண்டையிட்டிருக்கிறேன் - என்

இதயக் குமுறல்கள்

இந்த உலகில்

எதிரொலிக்கவே இல்லை என்று!

ஆனால்

பூங்காற்று மட்டும் வந்து

என் காதுகளில்

ரகசியம் சொன்னது

வாழ்க்கை வாழ்வதற்கே என்று!!!

இன்னும் மகனைப் பிரிந்த ஓர் தாயின் ஆதங்கமாய் தவிப்பு (பக்கம் 32) என்ற கவிதை அமைந்துள்ளது. பிள்ளைகளுக்காகவே தமது வாழ்வை அர்ப்பணித்து மகிழ்ச்சியை அவர்களோடு பகிர்ந்து, தன் முழு நேரத்தையும் அவர்களுக்காகவே செலவு செய்து வாழும் ஒரு தாயின் முதுமைப் பருவத்தில் முதியோர் இல்லத்தில் சேர்த்துவிட்ட தன் மகனின் வருகைக்காய் எதிர்பார்த்துக் காத்திருக்கும் ஒரு தாயின் ஆதங்கம், அவளின் கண்ணீர் இந்தக் கவிதை வரிகளில் தெரிகிறது. அந்தத் தாயின் உள்ளத்தை வெளிப்படுத்தும் முகமாக தனக்குள் அந்த வலியை உணர்ந்து கொண்டு சிறப்பாய் எழுதியிருக்கிறார். கவிதையின் சில வரிகள் இதோ:-

எனைப் பார்க்க

இன்று வருவாய்..

இல்லையில்லை

நாளை வருவாய்

என்றெண்ணியே

என் வாழ்நாள் கழிகிறது!

நாட்கள் சக்கரம் பூட்டி

ஓடும் என்று பார்த்தால்

அவையோ

ஆமை வேகத்தில் நகர்ந்து

என் உயிரை வதைக்கிறது!

ஒப்பனைகள் (பக்கம் 38) என்ற கவிதை வேஷமிடும் போலி மனிதர்களுக்கு சாட்டையடியாய் வந்து விழுகிறது. கொஞ்சம் அரசியலும் பேசுகிறது. 

வாக்குறுதியின்

மகிமை தெரியாதவர்களெல்லாம்

மேடைகளில்

வாக்குறுதிகளை

அள்ளி வீசுகிறார்கள்!

மனிதநேயம்

துளியுமற்றவர்களெல்லாம்

அதைப்பற்றி

கதைகதையாய்ப்

பேசுகிறார்கள்!

ஏழைகளைப் பார்த்து

நக்கலாக சிரிக்குமவர்கள்

தம் முன்னைய

வாழ்க்கையைப்பற்றி

சிந்திக்கவேயில்லை!

அகம்பாவத்தை

அகம் முழுவதும் சுமந்துகொண்டு

ஆன்மீகம் பேசுவது

வேடிக்கையாக இருக்கிறது!

மனிதத் தன்மையற்று

நடக்குமவர்கள்

மகான் என்று

தன்னை சொல்லிக்கொள்வதும்

வாடிக்கையாக இருக்கிறது!

அவர்களின்

முகத்திற்கும் அகத்திற்கும்

சம்பந்தமேயில்லாத பின்

ஒப்பனைகள் மட்டும் எதற்கு

அகற்றிவிடட்டும்!!!

எத்தனை உண்மை முகமே ஒப்பனை என்றாகிவிட்ட போது அதன் மீது இன்னும் ஒப்பனைகள் எதற்கு என்று தனது கவிதை மூலம் கொஞ்சம் காரசாரமாகவே கேட்கின்றார் ரிம்ஸா முஹம்மத். உண்மைகள் மரித்துப் போன உலகில் போலிகள் எவ்வளவு சுதந்திரமாக நடமாடுகின்றன. ஆனாலும் ஒரு நாள் வேஷம் கலைந்து விடத்தானே போகிறது. கேட்க வேண்டிய நியாயமான கேள்விதான். கவிஞர் கொஞ்சம் சூடாகவே கேட்டுவிட்டார்.            

தீராத மன நதி ஓட்டம் (பக்கம் 40) என்ற கவிதையில் தன் வலிகளை கண்ணீருக்குள் மறைத்து வைத்திருப்பதாகச் சொல்லி எம் மனதையும் உருக வைக்கிறார். அந்தக் கவிதை வரிகளை வாசிக்கும் போது எம் கண்களும் கசிகிறது.          

வெந்துபோன என்

உள்ளத்தில்

வந்துபோனவை

துன்பம் மட்டுமே..

நாதியற்ற என் நிலை

தேதி தெரியாத

முடிவை நோக்கியே!

தீர்ந்துவிட முடியாத

துன்ப ஓடைகளை

வலுக்கட்டாயமாக

கட்டுப்படுத்தினேன்..

என் கண்ணீருக்குள்!

மகிழ்ச்சி எங்கோ தொலைந்து போக, துன்பங்கள் மட்டுமே தொடர்ந்து வர.. என்றுதான் முடியும் இந்தச் சோக வாழ்க்கை என்று ஏங்கும் ஒரு ஏழை நெஞ்சத்தின் அங்கலாய்ப்பை அந்தக் கவிதை வரிகள் அடுக்காய்ச் சொல்லி அழ வைக்கின்றன.  

முகஸ்துதிப் புன்னகையின் பின்னால் மறைந்திருப்பவர்களைப் பார்த்து சில வரிகளும் அங்கே புன்னகைப் பூச்சு (பக்கம் 48) என்ற கவிதையில் முன்வைக்கப்படுகின்றன. வார்த்தைகளில் மட்டுமே வேதம் சொல்லித் திரியும் வேஷதாரிகளை தனது பின்வரும் இந்தக் கவிதை வரிகள் மூலம் தட்டிக் கேட்கிறார் கவிஞர். 

வெறும் பேச்சில் மாத்திரம்

நீ உச்சரிக்கிறாய் வேதம்..

நிஜத்தில் புனிதனாயிருக்காத

நீ சுட்டெரிக்கும் பூதம்!

சந்திரனைக் காட்டிக்காட்டி

பொய் கூறியது போதும்..

நீ அரிச்சந்திரனாயிரு

மெய்யாய் இனிமேலும்! 

அன்பும் கனிவும் மட்டுமல்ல சகோதரி ரிம்ஸா முஹம்மதின் கவிதைகளில் தைரியமும் வெளிப்படுகிறது. போராடி ஜெயிப்பதுவே வாழ்க்கை எனும் தத்துவத்தை வரிகளாய் வடித்து அந்த வரிகளுக்குள் வாழ்ந்தும் காட்டுகிறார். பாராட்டை மட்டுமே எதிர்ப்பார்த்து ஓர் எழுத்தாளன் பயணிக்க முடியாது. சில இடங்களில் பாறைகளின் மீதும் முட்டி மோதி, அந்தப் பாறைகளையும் உடைத்துத்தான் தனக்கான பாதையை உருவாக்கிக் கொள்ள வேண்டும் என்று சொல்லாமல் சொல்கிறது இவரின் பல கவிதை வரிகள். கானகத்தின் நடுவில் தனியாக தனக்கென்றொரு தனிப் பாதையை அமைத்துக் கொண்டு செல்லும் தைரியம் அவர் கவிதைகள் பலவற்றில் சிறப்பாக வெளிப்படுகிறது. ஒவ்வொரு கவிதைகளுக்குள்ளும் ஆயிரம் உணர்வுகள் பொதிந்துள்ளன. ஒவ்வொரு உணர்வுக்காகவும் ஒவ்வொரு கவிதையென்று அத்தனை கவிதைகளையும் தொடர்ந்து வாசிக்கத் தூண்டும் அருமையான நகர்வாக இந்தக் கவிதைத் தொகுதி அமைந்துள்ளது. 

கவிதைத் துறையில் மட்டுமல்லாமல் மெல்லிசைப் பாடல்கள், சிறுகதை, சிறுவர் படைப்புகள் போன்ற துறைகளில் தனது கவனத்தைச் செலுத்திவரும் இவர் நூல் விமர்சனத் துறையிலும் தனக்கென்றொரு தனியிடத்தைத் தக்க வைத்துக்கொண்டுள்ளார். இதுவரை 160 க்கும் மேற்பட்ட நூல்களுக்கு தனது நேரகாலங்களைச் செலவழித்து நூல் விமர்சனங்களை எழுதியுள்ளார். மேலும் ஏனைய இலக்கியவாதிகளுடனான 100 க்கும் மேற்பட்ட நேர்காணல்களையும் செய்து அதன் மூலமாகவும் நன்கு பிரபல்யம் பெற்றவர் என்பது குறிப்பிடத்தக்கது. ஈழத்து இலக்கிய வானில் ஒரு மின்னும் தாரகையாக மிளிரும் சகோதரி ரிம்ஸாவின் எழுத்துப் பணியோடு சமூகப் பணிகளும் இன்னும் சிறப்பாகத் தொடர வாழ்த்துக்கள்!!!

நூல் - எரிந்த சிறகுகள்

நூல் வகை - கவிதை

நூலாசிரியர் - ரிம்ஸா முஹம்மத்

தொலைபேசி - 0775009222

வெளியீடு - கொடகே பதிப்பகம்

விலை - 400 ரூபாய்

பதுளை ஹுமைரா அல் அமீன் 

தென்றலின் வேகம் மற்றும் எரிந்த சிறகுகள் ஆகிய இரு கவிதை நூல்கள் பற்றிய கண்ணோட்டம்

வெலிகம ரிம்ஸா முஹம்மதின் தென்றலின் வேகம் மற்றும்

எரிந்த சிறகுகள் ஆகிய இரு கவிதை நூல்கள் 

பற்றிய கண்ணோட்டம்

ஈழத்து இலக்கியத் துறையில் வடக்கு மற்றும் கிழக்கிலங்கைப் படைப்பாளிகளது பங்களிப்பைத் தொடர்ந்தே தென்னிலங்கை படைப்பாளிகளது பிரவேசம் இலக்கிய உலகில் நிகழ்ந்தது. தென்னிலங்கைக் கவிதைத் துறை வளர்ச்சிக்கு பல கவிஞர்கள் பங்களிப்புச் செய்துள்ளனர். தென்னிலங்கையின் ஆரம்பகட்ட இலக்கிய முயற்சிகளாக மதம் சார்ந்த செய்யுள் இலக்கியங்களே காணப்பட்டன. மார்க்க அறிஞர்களே இதன்போது இலக்கியவாதிகளாகவும், இலக்கியத் துறைக்குப் பங்களிப்புச் செய்தவர்களாகவும் இருந்தனர். பின்னர் பத்திரிகைகளின் தோற்றம் மற்றும் சமூக, அரசியல் துறைகளில் ஏற்பட்ட மாற்றங்கள் என்பன தென்னிலங்கை இளைஞர்கள் பலரது இலக்கியத் துறைப் பிரவேசத்திற்கு வித்திட்ட காரணிகள் எனலாம். 

1960களின் பின்னர் ஏராளமான தென்னிலங்கைக் கவிஞர்கள் தேசிய பத்திரிகைகள், சஞ்சிகைகள் மற்றும் தமிழக சஞ்சிகைகளில் தமது கவிதைகளை எழுதி வந்துள்ளனர். ஆயினும் இவர்களில் பெரும்பாலானோரது கவிதைகள் தொகுக்கப்பட்டு நூல்களாக வெளியிடப்படவில்லை. திக்குவல்லை கமாலின் 'எலிக்கூடு' (1973) கவிதைத் தொகுதியே தென்னிலங்கையின் முதலாவது புதுக்கவிதைத் தொகுதியாகும். 1973 முதல் 2022 ஆம் ஆண்டு வரை தென்னிலங்கையிலிருந்து 20 க்கும் கிட்டிய கவிதைத் தொகுதிகளே வெளிவந்துள்ளன. தென்னிலங்கைத் தமிழ்க் கவிதைகளில் சமயம், உள்நாட்டுப் போர், சமாதான வேட்கை, வறுமை, பெண்ணியம், சீதனம், காதல் முதலானவை பிரதான பாடுபொருள்களாகக் காணப்படுகின்றன. 

வெலிகம ரிம்ஸா முஹம்மதும் தென்றலின் வேகம், எரிந்த சிறகுகள் ஆகிய இரண்டு கவிதைத் தொகுதிகளை வெளியிட்டு கவிதைத் துறைக்கு பெரும் பங்களிப்புச் செய்துள்ளார். அத்துடன் இவர் இதுவரை எழுதியுள்ள முந்நூறுக்கும் மேற்பட்ட கவிதைகளில் பலவற்றை தேசிய பத்திரிகைளிலும் தேசிய மற்றும் சர்வதேச சஞ்சிகைகளிலும் களப்படுத்தியுள்ளார் என்பதும் குறிப்பிடத்தக்கது. ரிம்ஸா முஹம்மத், மாத்தறை மாவட்ட வெலிகம தேர்தல் தொகுதியைப் பிறப்பிடமாகக் கொண்டவர். பல்துறை இலக்கியங்களிலும் ஆர்வமுள்ள ஒரு கவிஞர், சிறுகதையாசிரியர், விமர்சகர், சிறுவர் இலக்கியப் படைப்பாளி, பாடலாசிரியர் என பன்முகப்பட்ட ஆளுமையுடையவர். 

ரிம்ஸாவின் முதலாவது இலக்கியப் படைப்பாக அவரது 'தென்றலின் வேகம்' என்ற கவிதைத் தொகுதி 2010 இல் வெளியிடப்பட்டது. தொடர்ந்து 'எரிந்த சிறகுகள்' என்ற கவிதைத் தொகுதியை 2015 இல் வெளியிட்டு கவிதைத் துறைக்கு பெரும் பங்களிப்புச் செய்துள்ளார். மேலும் 'ஆடம்பரக் கூடு' (2012), 'என்ன கொடுப்போம்' (2012), 'பாடல் கேட்ட குமார்' (2013) 'இதுதான் சரியான வழி' (2013) ஆகிய சிறுவர் கதை நூல்களும், 'வண்ணத்துப் பூச்சி' (2014) எனும் சிறுவர் பாடல் நூலும், 'கவிதைகளுடனான கைகுலுக்கல் ஒரு பார்வை' (2013), 'அறுவடைகள்' (2015) ஆகிய விமர்சன நூல்களும், 'விடியல்' எனும் ஆய்வு நூலும், 'எழுதாத பேனாவுக்கு எழுதிய சரித்திரம்' (2021) எனும் ஆவண நூலும் கணக்கீட்டுத் துறையில் 'வங்கிக் கணக்கிணக்கக் கூற்று', 'கணக்கீட்டுச் சுருக்கம்', 'கணக்கீட்டின் தெளிவு' ஆகிய 03 நூல்களுமாக இவரால் இதுவரை மொத்தம் 14 நூல்கள் வெளியிடப்பட்டுள்ளன. 

இவர் பூங்காவனம் இலக்கிய அமைப்பின் தலைவராகவும் "பூங்காவனம்" காலாண்டு சஞ்சிகையின் பிரதம ஆசிரியராகவும் தனது இலக்கியச் சேவையைத் தொடர்ந்து வருகிறார். அந்தவகையில் சஞ்சிகையின் துணையாசிரியர் தியத்தலாவ எச்.எப். ரிஸ்னாவோடு இணைந்து இதுவரை 38 பூங்காவனம் காலாண்டு இதழ்களைத் 2010 ஆம் ஆண்டிலிருந்து தொடர்ந்து வெளியீடு செய்து வந்துள்ளார். 

வெலிகம ரிம்ஸா முஹம்மதின் முதலாவது இலக்கியப் பிரசவமான 'தென்றலின் வேகம்' கவிதைத் தொகுதி 2010 ஆம் ஆண்டு இலங்கை முற்போக்குக் கலை இலக்கியப் பேரவையினால் வெளியிடப்பட்டது. கால வெள்ளம் அடித்துக் கொண்டு போக முடியாதபடி ஒரு சில கவிதைகளையாவது தமிழுக்குத் தர வேண்டும் என்ற இவரது கனவின் வெளிப்பாடாகவும் காலம் இவருக்கு அளித்த ரணங்களும் உலகை வெல்ல வேண்டும் என்று இவர் பொறுத்துக் கொண்;ட வடுக்கள் முதலிய வாழ்வின் அனுபவச் சுமைகளையும் எழுத்துக்களில் வடிப்பதற்காகவே 'தென்றலின் வேகம்' கவிதைத் தொகுதி படைக்கப்பட்டதாக இக்கவிதைத் தொகுதியின் என்னுரையில் வெலிகம ரிம்ஸா முஹம்மத் குறிப்பிடுகிறார். இக்கவிதைத் தொகுதியில் ஆராதனை, நிலவுறங்கும் நல்லிறவு, ஒலிக்கும் மதுர கானம், கண்ணீரில் பிறந்த காவியம், வெற்றியின் இலக்கு, விடியலைத் தேடும் வினாக்குறிகள் முதலான 64 கவிதைகள் இடம்பெற்றுள்ளன. 

'தென்றலின் வேகம்' கவிதைத் தொகுதியைத் தொடர்ந்து வெலிகம ரிம்ஸாவினது 'எரிந்த சிறகுகள்' என்ற இரண்டாவது கவிதைத் தொகுதி 2015 ஆம் வெளியிடப்பட்டது. 'எரிந்த சிறகுகள்' கவிதைத் தொகுதி பெரும்பாலும் அகவுணர்வு சார் விடயங்கள் மற்றும் சமூக யதார்த்த விடயங்களைப் பாடுபொருளாகக் கொண்ட கவிதைகளை உள்ளடக்கியதாகக் காணப்படுகின்றது. இத்தொகுதியில் 54 கவிதைகளும் 7 மெல்லிசைப் பாடல்களும் இடம்பெற்றுள்ளன. இவை பல்வேறு விடயங்கள் பற்றிப் பேசுகின்றன. ஆன்மீகம், சமுதாய விமர்சனம், நாட்டு நிலைமை, காதல் உணர்வுகள், தனிமனித உணர்வுகள், தனிமனித மேம்பாடு, பெண்ணியம், தொழிலாளர் நிலை, ஏழ்மை, அறிவுரை முதலான பல விடயங்களை இக்கவிதைகள் தொட்டு நிற்கின்றன.

 வெற்றிகள் உன்னை ஆளட்டும், வாழ்க்கைப் பூங்காற்று, தொலைத்த கவிதை, தவிப்பு, எல்லாம் மாறிப் போச்சு, என்ன வாழ்க்கை, காலங்களின் பிடிக்குள், ஓலைக் குடிசையும் பாதி நிலவும், சத்தமில்லாத யுத்தம் முதலான 54 கவிதைகளும் வெயில் நிறத்து தோல் கொண்டு, வல்லோனின் ஆணை, கண்கள் உன்னைத் தேடுதடி, ஆயிரம் சொந்தங்கள், ஏன் ஏன் அப்படிப் பார்த்தாய், பூக்கள் யாவையும், இந்த உலகம் நிலையில்லை முதலிய 7 மெல்லிசைப் பாடல்களும் 'எரிந்த சிறகுகள்' கவிதைத் தொகுதியில் இடம்பெற்றுள்ளன.

இனி 'தென்றலின் வேகம்' கவிதை நூலில் இருந்து இரசனைக்காக சில கவிதைகளை எடுத்து நோக்குவோம். 

குர்ஆன், நபிவழி என்பவற்றினைப் பின்பற்றி இம்மை வாழ்வைப் பண்படுத்திக் கொள்வதன் மூலம் அழிவே இல்லா நிரந்தரமான மறுமை வாழ்க்கையில் வெற்றி பெற்ற அடியானாக மிளிரலாம் என்பதை 'தென்றலின் வேகம்' நூலில் உள்ள வெலிகம ரிம்ஸாவினது 'உயிர் செய்' (பக்கம் 48) எனும் கவிதை எடுத்துரைக்கிறது. 

அல்லாஹ்வின் அடியானே! 

அவனி வாழ்விலே 

அப்பழுக்கில்லாமல் வாழ்ந்து 

ஆத்மாவை புதுப்பித்துக்கொள்! 

ஆஹிரத்தின் அமைவிடத்தை 

அதிர்ஷ்டவசமாய் 

பதிப்பித்துக்கொள்! 

சங்கை நபியாரின் 

ஷரீஅத்களை துறந்து 

சல்லாபத்தில் சஞ்சரிப்போனுக்கு 

சுவனம் என்பது இமயம்! 

போகும் பாதை சீராய் அமைந்தால் 

மறுமை இன்பமாய் அமையும்!

ரிம்ஸா முஹம்மதின் 'பொய் முகங்கள்' (பக்கம் 77) எனும் கவிதை, உள்நாட்டில் அண்மைக் காலங்களில் இனவாதம் தலைதூக்கவும் சிறுபான்மையினருக்கு எதிராக நாசகாரச் செயல்களை மேற்கொள்ளவும் துணையாய் நின்ற சில இனவாத மதப் போதகர்களின் செயல்களை விமர்சிப்பதாக அமைகிறது. இத்தகைய இனவாத சிந்தனை படைத்தவர்களின் போலி முகங்கள் குறித்து உணர்த்திட தொன்ம உத்தியினைக் கையாண்டுள்ளார். 

நீங்கள் 

நல்லவர்கள் தாம்! 

மிக மிக நல்லவர்கள் தாம்! 

அழுக்குண்ணி சிந்தையையும் 

அடுத்து கெடுக்கும் 

அடாவடித் தனத்தையும் 

அங்கிக்குள் மறைத்து..

அந்த அரிச்சந்திரனுக்கே 

அவ்வப்போது வாய்மை 

அரிச்சுவடியை 

கற்றுத் தந்தீர்களே 

அப்போதும் நல்லவர்கள் தாம்!

தொடர்ந்து 'எரிந்த சிறகுகள்' கவிதை நூலில் இருந்து சில கவிதைகளை இரசனைக்காக எடுத்து நோக்குவோம். 

ரிம்ஸா முஹம்மத், தனது 'காலங்களின் பிடிக்குள்' (பக்கம் 36) எனும் கவிதையில், சீதனத்தால் பெண்கள் எதிர்கொள்ளும் பிரச்சினையை புதியதொரு கோணத்தில் அணுகுகிறார். திருமணச் சந்தையில் இன்றும் ஆண்களுக்கான 'கேள்வி' உயர்ந்திருப்பதாலேயே ஆண்கள் விரைவில் சீதனத்திற்கு விலைபோகிறார்கள். 

பணத்துக்கு ஆசைப்பட்ட நீ 

கொழுத்த சீதனம் தின்று 

பங்களா வீட்டின் எஜமான் 

என்ற பெயரில் 

வேலைக்காரனானாய்!

காதலிக்கும் போது பொருளாதார வேற்றுமைகளை கருத்திற் கொள்ளாது உருக உருகக் காதல் செய்த காதலன் திருமணம் என்று வரும் போது மாத்திரம் சீதனத்திற்கு ஆசைப்பட்டு காதலை உதறிச் செல்கின்றான். சீதனத்தின் காரணமாக இத்தகையதோர் துரோகம் இழைக்கப்பட்டதை எண்ணி துயருறும் காதலியின் உள்ளக் குமுறலாக இக்கவிதை அமைகிறது. ஆணாதிக்க மரபின் ஓர் அம்சமான சீதனம் எனும் சாபக்கேட்டினால் பெண்களின் வாழ்க்கையிலும் சமூகத்திலும் ஏற்படக்கூடிய சீர்குலைவுகளையும் பெண்கள் பற்றிய பாரம்பரியமான கருத்துக்களையும் அழுத்தமாகப் தமது கவிதைகளில் பேசியுள்ளனர்.

வெலிகம ரிம்ஸாவின் 'நிகரற்ற நாயனே' (பக்கம் 46) எனும் கவிதையின் ஆரம்ப வரிகள், வல்ல இரட்சகனாகிய அல்லாஹ்வின் வல்லமையைப் போற்றியும் அவனது அருட்கொடைகளை நினைவு கூர்வதாகவும் அமைந்துள்ளது. 

யா அல்லாஹ் 

அலைகளின் நாதத்திலும் 

உன் வல்லமையை 

இனிதே காணுகிறேன்! 

குயிலின் ராகத்திலும் - உன்

குத்ரத்தின் வலிமைதான் 

துல்லியமாய் ஒலிக்கிறது.. 

உன் அருள் மழையால் 

இவ்வுலகம் செழிக்கிறது!

 

இத்தகைய அருட்கொடைகளின் நாயகனான அல்லாஹ்விடம் தனது வாழ்வு வளமாக கருணை புரியுமாறு மன்றாடி நிற்பதாக கவிதையின் இறுதி வரிகள் உள்ளன. 

நான் பயணிக்க வேண்டியுள்ளேன் 

இன்னும் தொலை தூரமும் 

தீயவற்றிலிருந்து 

என்னைக் காத்;திடு 

எல்லா நேரமும்!

 

மேலும் ரிம்ஸா முஹம்மது தனது 'இருகரம் ஏந்திடுங்கள்' (பக்கம் 61) எனும் கவிதையில், நவீன உலகினில் நல்வழி தவறாது, தொழுகை முதலிய இஸ்லாத்தின் கடமைகளை நிறைவேற்றுவதன் மூலமும் நல்லிணக்கம், அயலாருடன் நட்புறவு பேணல் முதலிய இஸ்லாம் காட்டித் தந்த ஒழுக்க விழுமியங்களின் மூலமும் இம்மை, மறுமை வாழ்வை செம்மையாக்க முயல வேண்டும் எனக் குறிப்பிடுகிறார்.

ரிம்ஸா முஹம்மதின் 'வசந்த வாசல்' (பக்கம் 101) எனும் கவிதையில் தொன்ம உத்தி கையாளப்பட்டுள்ளது. இக்கவிதையில் இராமன் மற்றும் இராவணன் ஆகியோரின் குணங்களைக் கூறுவதனூடாக மனித உள்ளத்தின் தன்மை குறித்து இலகுவாக வாசகர்களுக்கு உணர்த்த முனைந்துள்ளார் கவிஞர் ரிம்ஸா முஹம்மத். 

எல்லோரும் 

இராமர்கள் தானே.. 

தத்தமது இராவணக் குணங்கள் 

அம்பலமாகும் வரை!

தியாகத்திற்கு இலக்கணமாய் அமையும் ஹஜ்ஜுப் பெருநாளின் வரலாற்றையும் அதன் மகிமையையும் வெலிகம ரிம்ஸா அவர்களது 'தியாகத் திருநாள்' (பக்கம் 103) எனும் கவிதை எடுத்துரைக்கிறது. 

இப்ராஹீம் நபியவர்தான் 

இஸ்லாமிய இலட்சியத்தால் 

இனிதான புதல்வரையும்

இழந்திடத் துணிந்தாரே! 

ஹாஜரா அம்மையாரும் 

அராபியப் பாலையிலே 

வல்லவன் கட்டளையை 

வாஞ்சையுடன் செய்தாரே!

 

ரிம்ஸா முஹம்மதின் 'ஓலைக் குடிசையும் பாதி நிலவும்' (பக்கம் 105) எனும் கவிதை வாழ்க்கையில் சொல்லொனாத் துயரங்கள் சூழ்ந்து வந்தாலும் படைத்த இறைவன் மீதான நம்பிக்கையை இழக்காது, இஸ்லாத்தின் கடமைகளை சரிவர நிறைவேற்றுவதன் மூலம் அல்லாஹ்வின் உதவியை நாட வேண்டும் என வலியுறுக்துவதோடு நாளை வரும் மறுமைக்கான விளைநிலமே உலகம் எனும் வாழ்க்கையின் யதார்த்தத்தை உணர்ந்து சீறிய வாழ்க்கை வாழ வேண்டும் என்றும் எடுத்துரைக்கிறது. 

 

உடைந்து தொங்குது 

என் குடிசைக் கூரை - வார்த்தோமே 

வீடு பணம் சுனாமிக்குத் தாரை! 

பொல்லாத கஷ்டங்கள் 

பல வந்தபோதும் 

அல்லாஹ்வைத் தவிர 

நம்பினோம் யாரை?

மனிதனை மதி இழக்கச் செய்யக் கூடிய இஸ்லாத்திற்கு முரணான மூடக் கொள்கைகளிலிருந்தும் களவு, பொய் முதலான பாவ காரியங்களிலிருந்தும் தவிர்ந்து நடந்து அல்லாஹ்வின் திருப்பொருத்தத்தை நாடுமாறு மனித சமுதாயத்திற்கு கவிஞர் அறைகூவல் விடுப்பதாக வெலிகம ரிம்ஸாவின் 'பாராமுகம் ஏனோ?' (பக்கம் 109) எனும் கவிதையின் பின்வரும் வரிகள் அமைகிறது. 

மதியை இழக்கச் செய்து 

விதியை மாற்றுகின்ற 

வித்தைகளை - மனிதா 

நீ விட்டுவிடு! 

துணையாய் 

அல்லாஹ்வை ஏற்று 

இணையில்லா அவன் அருளை 

குறைகளின்றி பெற்றுவிடு!

இவ்வாறாக, இஸ்லாத்தின் சிறப்புக்களையும் இஸ்லாம் கூறும் வாழ்க்கையையும், விழுமியக் கருத்துக்களையும் கொண்ட மிகச் சிறந்த சமயசார் கவிதைகள் இந்த 'எரிந்த சிறகுகள்' கவிதைத் தொகுதியில் உள்ளடங்கியுள்ளன. 

தனது சிந்தனைக் கனதியையும் அவர் தம் புரட்சிகரமான சிந்தனைகளையும் வெளிப்படுப்படுத்த உருவ ரீதியில் புதுக் கவிதையை அதிகம் கையாண்டு இவர் தனக்கே உரிய பாணியில் சிறப்பாகக் கவி புனைந்துள்ளார். தனது நேரகாலங்களை இலக்கியத்துக்காக அர்ப்பணித்து சிறப்பான திட்டமிடல் முறையில் காத்திரமாக இலக்கியப் பணியாற்றிவரும் படைப்பாளி வெலிகம ரிம்ஸா முஹம்மதுக்கு என் மனமார்ந்த வாழ்த்துகள்!!!

தர்காநகர் சுமையா ஷரிப்தீன் 

(தென்கிழக்குப் பல்கலைக்கழக மொழித்துறை உதவி விரிவுரையாளர்)

திறனாய்வு : தகவல் பொக்கிஷமாக வெலிகம முஹம்மதின் விடியல் ஆய்வு நூல் - கே.எஸ். சிவகுமாரன்

தகவல் பொக்கிஷமாக வெலிகம முஹம்மதின் விடியல் ஆய்வு நூல் 

- கே.எஸ். சிவகுமாரன்

ஈழத்தில் பிறந்த எழுத்தாளர்களும், இலங்கையில் பிறந்து பிற நாடுகளில் குடிபுகுந்த பல கவிஞர்களும், நம்நாட்டு ஊடகங்களிலும், மின்னியக்க முகநூல்களிலும் நிறையவே  எழுதி வருகிறார்கள். இவர்களுள் கணிசமான எண்ணிக்கையுடையவர்கள் முஸ்லிம் பெண்களாவர். இது வரவேற்கத் தக்க ஒரு போக்கு. அவர்களுள் ஒருவர், வெலிகமயைப் பிறப்பிடமாகக் கொண்டவரும், "பூங்காவனம்" என்ற சஞ்சிகையை நடத்தி வருபவருமான ரிம்ஸா முஹம்மத் என்பவராவார். இவர் கவிதை, கட்டுரை, கதைகளோடு, நேர்காணல்களையும், திறனாய்வுகளையும் எழுதி வருகிறார். 

இதுவரை 14 நூல்களை எழுதியுள்ளார். அவருடைய நூல்களில் ஒன்று 'விடியல்' (2017) என்பதாகும். வைத்திய கலாநிதி எம்.கே. முகுகானந்தன் இந்த நூல் என்ன கூறுகின்றது? எப்படிக் கூறுகின்றது? ஏன் அப்படிக் கூறுகின்றது? என்பதை அழகாக விபரித்துள்ளார். வாசகர்கள் இவரது முன்னுரையை அவசியம் வாசித்துப் பயன்பெற வேண்டும். 

இந்த நூல், மூதூர் முகைதீன் என்ற கவிஞரின் கவிதைகளை கச்சிதமாக பகுப்பாய்வு செய்கிறது. கவிஞரின் மூன்று கவிதைத் தொகுப்புகளை ரிம்ஸா ஆராய்கிறார். 

ரிம்ஸாவின் தகைமைகள், முகைதீனின் ஆளுமை போன்ற பொருள்கள் பற்றி, ஆசிரியை கிண்ணியா எஸ். பாயிஸா அலி சிறப்பாக எடுத்துக் கூறுகிறார். 

நூலாசிரியர் ரிம்ஸா கூறுகிறார்: "கொழும்பு பல்கலைக் கழகத்தின் இதழியல் டிப்ளோமா பாட தெறிக்காக என்னால் மேற்கொள்ளப்பட்ட இந்த ஆய்வை "விடியல்" என்ற தலைப்பில் சில விடயங்களை சேர்த்தும், சில விடயங்களைத் தவிர்த்தும் இந்நூலை வெளியிடு செய்கிறேன்."

நூலாசிரியர் மொத்தமாக ஐந்து அத்தியாயங்களில் தனது பார்வையைச் செலுத்தியுள்ளார். எவற்றை விரிவுபடுத்தி விளக்கமாக அமைகிறது என்பதையறிய, வாசகர்கள், குறிப்பாக பல்கலைக்கழக, மாணவர்கள் 'விடியல்' என்ற நூலைப் படித்துப் பயன்பெற வேண்டும். 

உள்ளடக்கச் சிறப்புகளை நான் வேறு எடுத்துக் கூறுவது அவசியமில்லை. முடிவுரையும், உசாத்துணை நூல்கள், பின்னினைப்புகள் ஆகியனவும் பயன் தருவன. 

மறைந்த திறனாய்வாளரும் (விமர்சகரும் கூட) நாவலாசிரியரும், சஞ்சிகை ஆசிரியருமான க.நா.சு. அவர்களின் கூற்றுக்களை, நூலாசிரியர் கொடுத்திருப்பது வரவேற்கத்தக்கது. 

நூலாசிரியர் தமிழிலக்கியத்தில் புலமை பெற்று உள்ளார் என்பதை விளக்க அவரது கூற்று ஒன்று போதுமானது. அதாவது: 

"தொண்ணூறுகளுக்குப் பின் வந்த கவிதைகளின் போக்குகளைப் பின்வருமாறு தொகுத்துக் கூறலாம்: திராவிட இயக்கத் தாக்கம், இனக் குழு அடையாளம், தொன்மம், மண் சார்ந்த படைப்பு என வெளிப்படும் பின் நவீனத்துவக் கவிதைகள், மண்சார்ந்த கவிதைகள் போன்றனவாகும்."

சில குறிப்பிட்ட தமிழகக்காரர்களின் பெயர்களைக் குறிப்பிட்டு, "சிற்றூர், கிராமம் சார்ந்த வாழ்க்கைச் சித்திரங்கள் நகரமயமாதலின் விளைவு, வாய்மொழி வழக்கில் எழுதும் தன்மை, உள்ளூர் அனுபவங்களை உலகளாவிய போக்குகளுடன் இணைத்தல் எனப் புதிய மாற்றங்களை இக்கவிஞர்களால் தமிழ் கவிதை பெற்றது" என்கிறார் ரிம்ஸா. 

கவிதையின் வெளிப்பாடுகள் என்ற தலைப்பில் தமிழகக் கவிஞர்கள் சிலரின் பெயர்களைக் குறிப்பிடுகிறார். அவை எனக்குப் பல தகவல்களைத் தருகின்றன. 

அத்தியாயம் 03 இல், கவிஞர் மூதூர் முகைதீன் பற்றிய முழுவிபரங்களும் தரப்படுகின்றன. அதுவே கட்டுரையாசிரியரின் நோக்கமாகும். அக்கவிஞர் பற்றி நான் மேலும் அறிந்து கொள்ள இந்த ரிம்ஸாவின் நூல் பெரிதும் உதவுகிறது. 

சிறந்த சிங்கள இலக்கிய மொழி பெயர்ப்பாளராகவும், திறனாய்வாளராகவும், கவிஞராகவும், பேச்சாளராகவும் விளங்கும் திக்குவல்லை கமால் பின் அட்டையில் குறிப்பிடும் சில வரிகள் அழகாய் அமைந்துள்ளன. அவர் கூறுகிறார்: 

ரிம்ஸா "வேதனைகளையும் சோதனைகளையும் வென்றபடி, சாதனைகளை அடுக்கிச் செல்லும் அபார திறமைசாலி என்பதை அடிக்கடி உறுதிப்படுத்திக் கொள்கிறார். தென்னிலங்கை என்று நாம் கொண்டாட எமக்கிருந்த இடைவெளியை நிரப்பிக் கொண்டு கம்பிரமாக நிமிர்ந்து நிற்கிறார்."

படித்துப் பயன்பெற 'விடியல்' நூலை வாசித்துப் பாருங்கள். 

நன்றி - தினகரன் வாரமஞ்சரி 

வெலிகம ரிம்ஸா முஹம்மத் எழுதிய "எரிந்த சிறகுகள்" நூல் பற்றிய திறன் நோக்கு

வெலிகம ரிம்ஸா முஹம்மத் எழுதிய "எரிந்த சிறகுகள்" நூல் பற்றிய திறன் நோக்கு

நூல் விமர்சனம்:- இக்பால் அலி

வெலிகம ரிம்ஸா முஹம்மத் எழுதிய "எரிந்த சிறகுகள்" என்ற கவிதை நூலை நுகர்ந்து சுவைத்துப் பார்க்கக் கிடைத்தது. பெண்ணினம் அனுபவித்து வரும் சொல்லொண்ணாத் துயரங்களை வெளிப்படுத்தக் கூடிய மிக அருமையான கவிதைத் தொகுதியாக இந்த நூல் அமைந்துள்ளது குறிப்பிடத்தக்கது.

ஆணைக் கருவாகச் சுமந்து பெற்றெடுக்கும் பெண்கள், அந்த ஆண்களின் மூலம் பெண்கள் ஈவு இரக்கமில்லாமல் கொடுமைப்படுத்தப்பட்டு வரும் ஈனச் செயலையும் சமூகம் முழுவதும் பரவிக் கிடக்கும் பல்வேறுபட்ட பிரச்சினைகளையும் கவிஞை ரிம்ஸா முஹம்மத் இந்நூலில் சிறப்பாகப் பதிவு செய்துள்ளார்.

உளவியல் ரீதியான கருத்துக்களையும் பெண்கள் அனுபவிக்கின்ற கொடூரமான சீதனப் பிரச்சினைகளையும் ஆண்களினால் ஏமாற்றப்படுதலையும், ஆண்களின் அடக்குமுறைகளையும் பெண்களது ஏக்கங்களையும், நம்பிக்கைகளையும், காதல் உணர்வுகளையும் தமது கவிதைகளின் மூலம் தன்னைப் படைத்து நேசிக்கும் இறைவனிடம் முறைப்பாடு செய்யும் ஒரு முறையீடாக வெளிக்கொணர்ந்துள்ளார்.

மனித வாழ்விலிருந்து பெண்களது வாழ்க்கை நிலையில் மாற்றம் ஏற்பட்டு வந்தாலும் சிலவேளை நல்லவர் போல் நடித்து ஏமாற்றும் ஆண்களிடம் சூழ்ச்சி நிறைந்த சதிவலையில் சிக்குண்டு பெண்கள் சிதைந்து, சீரழிந்து சின்னா பின்னமாகிப் போய் விடுகிறார்கள். இன்னும் பெண்கள் ஆண்களின் போகப் பொருளாகவும் விளம்பரக் காட்சிப் பொருளாகவும் மட்டுமே பார்க்கப்படுகிறார்கள். இத்தகைய நிலையில் இருந்து பெண்கள் விடுதலையும் சுகமும் பெற வேண்டும் என்பதைப் பாடுபொருளாகக் கொண்ட இக்கவிதைத் தொகுதியிலுள்ள பல சிறப்பான கவிதைகள் கவிஞை ரிம்ஸாவின் உணர்ச்சிகளின் வெளிப்பாட்டைத் தரிசிக்கச் செய்கின்றது. அதேவேளையில் கவிஞையுடைய சில கவிதைகள் சமகாலத்தையும் படம்பிடித்துக் காட்டக் கூடியதாக அமைந்துள்ளன.

செழிப்புடன் வாழ்ந்தோர் முகத்திலெல்லாம்

பட்டினித் துயர்தான் படர்கிறதே
சூழ்ந்தது துன்பம் எமைச் சுற்றி
சுகமது உண்டோ வாழ்க்கையிலே?

'என்ன வாழ்க்கை' (பக்கம் 35) என்னும் தலைப்பில் அமைந்த கவிதையின் சில வரிகளே மேலே தரப்பட்டவையாகும்.

மனித நேயம் என்பது தாம் வாழும் சூழலில் வெறும் கண் துடைப்பாகவே காட்டப்படுகிறது. மனிதர்களுக்கிடையே காருண்யம், அன்பு, பிரியம், சிநேகம் இருத்தல் அவசியமாகும் எனவும் மிருகங்களைப் பலியிடுவது கூடாது எனவும் மேடை போட்டுப் பேசுபவர்கள்தான் மறுபுறத்தில் மனித நேயத்திற்கு எதிரான செயற்பாடுகளில் ஈடுபட்டு வருகின்றனர். குறிப்பாக மறைமுகமான முறையில் மனிதக் கொலை வெறியாட்டத்திலும் ஈடுபட்டு வருகின்றனர். மனித நேயம் என்பது முக்கியத்துவமானது. ஆனால் அது தற்காலத்தில் மனிதர்களிடையே வீழ்ச்சியின் விளிம்பில் தத்தளிக்கிறது.

கொடூரமான சிந்தனைப் போக்குடையவர்களால் திட்டமிட்ட விதத்தில் மனித நேயம் மனிதச் சமூகத்தில் இருந்து ஓரங்கட்டுதலுக்கும் அச்சுறுத்தலுக்கும் உள்ளாகியுள்ளன. 'மனித நேயம்' என்கின்ற சொல் மிக உயர்வானதும் புனிதத் தன்மை வாய்ந்ததும் ஆகும். மனித நேயம் ஒவ்வொருவருடைய மனதை விட்டும் காணாமல் போகும் அபாயம் உள்ளது. அப்படி நடக்காமல் பாதுகாத்துக் கொள்வது நமது கடமையே. எனவே நாம் இந்த அவல நிலையில் இருந்து மீண்டெழுதல் மிக அவசியம் என்று கவிஞை ரிம்ஸா முஹம்மத் மனம் பதறிக்கொண்டு அவலக் குரல் எழுப்புகின்றார்.

மனித நேயம்
துளியுமற்றவர்களெல்லாம்
அதைப்பற்றி
கதை கதையாய்ப்
பேசுகிறார்கள்..

இது 'ஒப்பனைகள்' (பக்கம் 38) என்னும் தலைப்பில் எழுதிய கவிதையின் சில வரிகளாகும். கவிஞை ரிம்ஸா தனது கவிதையின் மூலம் தம் ஆளுமையை எந்தளவுக்கு ஆழமாகப் பதிவு செய்ய முடியுமோ அந்தளவு ஆழத்திற்கு சிறப்பாகப் பதிவு செய்துள்ளார். இதன் மூலம் உயர் நிலையை அடையலாம் என்று சொல்லுமளவுக்கு இவரது கவிதை வரிகளில் யதார்த்த வாதமும் கவித்துவமும் கற்பனை அழகும் உணர்ச்சிச் செறிவும் தனித்துவ முத்திரையும் காணப்படுகின்றன.

இருளின் போர்வைக்குள்
சிக்குப்பட்டுப் போன
சூரியனுக்கே
விடிந்தால்
விலாசம் வருது..

போரின் வடுக்களுக்குள்
அகப்பட்டுப் போன
மக்களுக்கு
எப்போது விலாசம் வரும்?

கவிதை ரிம்ஸா 'காலத்தின் ஓலம்' (பக்கம் 76) என்ற தலைப்பில் எழுதிய கவிதையின் சில வரிகளையே மேலே தரப்பட்டுள்ளது. மிகக் கொடிய போர்க்கால யுகத்தை மீளவும் திரும்பிப் பார்க்கக் கூடியதாக மேலுள்ள கவிதை வரிகள் காணப்படுகின்றன.

போர்க் காலத் தடங்கள் இந்தக் கவிதையில் ஊடாடி நிற்பதைப் பார்க்கின்ற போது நெஞ்சோடு அணைத்துக்கொள்ள முடிகின்றது. வாசித்த உடனே நினைவில் நிறுத்திக்கொள்ள வேண்டும் என்ற ஆர்வம் ஏற்படுகிறது. ஆரம்பத்திற்கு முடிவொன்று இருப்பது போல, இருட்டுக்கு வெளிச்சம் இருப்பது போல போரினால் பாதிக்கப்பட்ட மக்களின் நெஞ்சோடு உள்ள வடுக்களை இல்லாமல் செய்வதற்கு என்னதான் வரப்பிரசாதங்களை அவர்களுக்கு அள்ளி அள்ளிக் கொட்டினாலும் அவை ஒருபோதும் மறக்க முடியாத வடுக்களே என்கிறார் கவிஞை. கையில் சூரியனைவிடப் பெறுமதியான செல்வத்தைக் கொண்டு வந்து கொடுத்தாலும் போரினால் காயப்பட்ட மக்கள் எந்தவொரு வரப்பிரசாதத்தையும் பெற்றுக்கொள்ளத் தயாரில்லை. ஏனென்றால் இந்த கண் துடைப்பெல்லாம் அவர்களின் துயரங்களைத் துடைத்தெறியாது என்பதனாலாகும்.

தனக்கே உரிய பாணியில் திரும்பத் திரும்ப வாசித்து நினைவில் மறக்காமல் வைத்திருக்கின்ற கவிதைகளை எரிந்த சிறகுகள் கவிதை நூலில் பரவித்; தந்துள்ளார் கவிஞை ரிம்ஸா.

பச்சையணி தேயிலை மலையில்
இச்சையோடு துரையிருப்பான்
கொழுந்தை பெண்கள் பறித்தாலும்
கொடும் பேச்சால் துளைத்தெடுப்பான்..

'முகவரி தேடும் மலையகம்' (பக்கம் 120) என்னும் தலைப்பில் எழுதிய மிக அருமையான கவிதையின் வரிகளே இவையாகும்.

மலையகப் பெண்கள் தம் உடலின் வியர்வைத் துளிகளை உதிரமாக நீர் பாய்ச்சி தேயிலைக் கொழுந்துகளைப் பறிப்பவர்கள். சிலவேளைகளில் துரைமார்களுடைய பார்வையில் போகப் பொருளாகவும் பார்க்கப்படுவாள். அவள் உடல் அட்டை கடிக்கும் கடுமையான வேலைப் பணிக்கும் கடுமையான வெயிலுக்கும் கடுமையான குளிருக்கும் உள்ளாகித் தம் உடல் அமைப்பிலும் வேறுபடுத்திக் காட்டக் கூடியவர்களாக இருப்பார்கள். கங்காணிமார் அல்லது துரைமார்களுடைய சினச் சொற்கள் தினசரி காதுகளில் உள்வாங்கப்பட்டு அவ் விசக் கருத்துகள் எவ்வளவுதான் மனதில் தைத்துக் கொண்டிருந்தாலும் சரி, தம் உடலில் எவ்வளவுதான் அதிர்வுகளை ஏற்படுத்தினாலும் சரி அதற்கு மாறாக அவர்கள் அந்த வலிகளை உதிர்த்துவிட்டு மனம் நொந்து, வெந்து பழக்கப்பட்ட இந்த மலையகப் பெண்கள்தான் இந்நாட்டுக்கு தேயிலையின் மூலம் அந்நியச் செலாவணியை அதிகம் பெற்றுத் தருபவர்கள். இப் பெண்கள்தான் இந்நாட்டின் விலையும் மதிப்பும் அழகும் மிக்கவர்கள் என்பதன் காட்சிகளைத் தம் கவிதைகளில் கவிஞை மிக அழகாகப் படம்பிடித்துக் காட்டியுள்ளார்.

ஆக, பெண்களது சமூக முன்னேற்றத்துக்கும் ஆண்களோடு பெண்களும் சரிநிகர் சமனாகப் பயணம் செய்ய வேண்டும் என்று துடிக்கும் இளம் சந்ததியினர்களுக்கும் "எரிந்த சிறகுகள்" என்ற இந்தக் கவிதைத் தொகுதியில் நல்ல பாடுபொருள்கள் உள்ளன.

கலாநிதி துரை மனோகரன் எழுதிய முன்னுரையில் 'இக்     கவிதைத் தொகுதியில் 54 கவிதைகளும் 7 மெல்லிசைப் பாடல்களும் இடம்பெற்றுள்ளன. இவை பல்வேறு விடயங்கள் பற்றிப் பேசுகின்றன. ஆன்மிகம், சமுதாய விமர்சனம், நாட்டு நிலைமை, காதல் உணர்வுகள், தனிமனித உணர்வுகள், தனிமனித மேம்பாடு, பெண்ணியம், தொழிலாளர் நிலைமை, ஏழ்மை, அறிவுரை முதலான பல விடயங்கள் ரிம்ஸாவின் கவிதைகள் தொட்டு நிற்கின்றன' என்று குறிப்பிட்டுள்ளார்.

இந்த நூலுக்கான அணிந்துரையை வைத்திய கலாநிதி கவிஞர் தாஸிம் அகமது முன்வைத்துள்ளார். அடுத்து இந்நூல் பற்றி கவிமணி என். நஜ்முல் ஹுஸைன் குறிப்பிடுகையில் 'வாசிப்போர் இலகுவில் புரிந்துகொள்ளும் வகையில் கவிதை படைப்போர் தமது முயற்சிகளிலே வெற்றி பெறுகின்றனர். தமக்கும் புரியாது வாசிப்போரையும் குழப்பம் கவிதை நூல்கள் வாசகர்களால் புறந்தள்ளப்படுகின்றன. அந்த வகையில் மிகவும் இலகுவான சொற்களினால் தனது கவிதைகளை ஆக்கியுள்ளார் கவிதாயினி ரிம்ஸா முஹம்மத்' என்று தமது கருத்துரையில் பாராட்டிக் குறிப்பிட்டுள்ளார்.

வாழ்த்துரையினைத் தேசிய கல்வி நிறுவகத்தின் இலங்கை திறந்த பல்கலைக்கழகத்தின் முதன்மை ஆசிரியரும் கண்டி கல்வி வலய ஆசிரியர் ஆலோசகருமான திருமதி. ரதி. தேவ சுந்தரம் வழங்கியுள்ளார். அழகிய அட்டைப் படத்துடன் வெளிவந்துள்ள இந்த நூலுக்கான பின்னட்டைக் குறிப்பை டாக்டர் எம்.கே. முருகானந்தன் அவர்கள் முன்வைத்துள்ளார். கவிஞை ரிம்ஸாவின் பணி தொடர வாழ்த்துகிறேன்!!!


நூல் - எரிந்த சிறகுகள்
நூல் வகை - கவிதை
நூலாசிரியர் - வெலிகம ரிம்ஸா முஹம்மத்
தொலைபேசி - 0775009222
வெளியீடு - கொடகே பதிப்பகம்
விலை - 400 ரூபாய்


நூல் விமர்சனம்:- இக்பால் அலி

2020.08.30 தினகரன் வாரமஞ்ரியுடன் வெளிவரும் இணைப்பிதழான செந்தூரம் இதழில் எனது அட்டைப் படம் தாங்கி வெளிவந்தத நேர்காணல்.

2020.08.30 தினகரன் வாரமஞ்ரியுடன் வெளிவரும் இணைப்பிதழான செந்தூரம் இதழில் எனது அட்டைப் படம் தாங்கி வெளிவந்தத நேர்காணல்.

நன்றி - கலைஞர் கே. ஈஸ்வரலிங்கம்

தெற்கிலிருந்து ஒரு பெண் ஆளுமை - வெலிகம ரிம்ஸா முஹம்மத்

(ஓர் எழுத்தாளர். இலக்கியச் செயற்பாட்டாளர், சமூக ஆர்வலர், விமர்சகர், சஞ்சிகையாசிரியர்  மற்றும் ஊடகவியலாளர்)

செந்தூரம் இதழுக்கான, நேர்காணலில் எம்மோடு இணைந்திருப்பவர் ஓர் எழுத்தாளர். இலக்கியச் செயற்பாட்டாளர், சமூக ஆர்வலர், விமர்சகர் மற்றும் ஊடகவியலாளர் எனப் பல பரிமாணங்களில் மிளிரும், பூங்காவனம் இலக்கிய சஞ்சிகையின் பிரதம ஆசிரியர் வெலிகம ரிம்ஸா முஹம்மத்.

உங்களைப் பற்றிய அறிமுகத்தை எமது வாசகர்களுக்காகக் கூறுங்கள்?

பாய்ந்தோடும் இயற்கை எழிலாய் நில்வளா கங்கையும் நீலவானின் நிறத்தையொத்த அழகிய கடலும் கொண்டமைந்த இலங்கையின் தென் மாகாணத்திலுள்ள வெலிகமையே எனது பிறப்பிடமாகும். இந்த ஊரின் நாமத்தை எனது பெயரோடு இணைத்து, வெலிகம ரிம்ஸா முஹம்மத் என்ற பெயரில் எழுதி வருகின்றேன்.

2004 ஆம் ஆண்டு தினமுரசுப் பத்திரிகையில் நிர்மூலம் என்ற கவிதையை எழுதியதைத் தொடர்ந்து 17 ஆண்டுகளாக எழுதி வருகின்றேன். இதுவரை 13 நூல்களை வெளியிட்டுள்ளேன். இவை கணக்கீடு, கவிதை, நூல் விமர்சனம், சிறுவர் கதைகள், சிறுவர் பாடல்கள், ஆய்வு ஆகிய வகைகளிலான நூல்களாகும்.

அகம் சார்ந்தவை, பெண்ணியம், நட்பு, சமூக அவலம், சீதனக் கொடுமை, போர்ச் சூழல், போரின் அவலங்கள், நாட்டு நடப்புகள், உலக நடப்புகள், உறவுகளின் விரிசல், தனிமனித வாழ்வு, சமூக அக்கறை, மானிட நேயம், இயற்கையின் வனப்பு, இயற்கை அனர்த்தங்கள், போதையின் அவலம், வறுமைப் புயல், சுயநல உறவுகள், பெண்கள் எதிர்கொள்ளும் பிரச்சினைகள், ஜீவகாருண்யம், ஆன்மீகம் போன்றவற்றைப் பாடுபொருள்களாகக் கொண்டே எனது படைப்புக்கள் அமைந்துள்ளன.

இலக்கியத் துறையில், உங்களுக்கு எப்படி நாட்டம் ஏற்பட்டது? அந்த முதல் அனுபவத்தைப் பற்றி பகிர்ந்துகொள்ளலாமே?

வாசிப்பு அனுபவம்தான் என்னை ஓர் எழுத்தாளராக உருவாக்கியது. நான் பத்திரிகை உலகத்தையோ அல்லது எழுத்துத் துறையையோ அறிந்திருக்கவில்லை. எதுவும் தெரியாமல்தான் வாசிக்க ஆரம்பித்தேன்.

நான் வாசிக்க ஆரம்பித்த காலங்களில் எமது உறவினரான மாமா ஒருவர் அந்தக் காலத்தில் ஒரு பிரபல்யமான எழுத்தாளராக இருந்தார். அவரது பெயர் எஸ்.ஐ.எம். ஹம்ஸா என்பதாகும். அக்காலத்தில் அவர் திக்குவல்லை ஹம்ஸா என்ற பெயரில் தனது படைப்புக்களை பத்திரிகைகளில் களப்படுத்தி வந்தார். இந்த மாமாவே தனது சிறுகதைகளை எனக்கும் வாசித்துக் காட்டி, என்னை இத்துறையில் ஈடுபாடு காட்ட ஒரு அடிக்கல்லை நாட்டினார். நிச்சயமாக இந்த மாமா இன்று உயிரோடு இருந்தால் என்னைப் பார்த்து மிகவும் சந்தோசப்படுவார். அவரின் இழப்பு இன்றும் எனக்கு ஆ(மா)றாத வடுவாகவே உள்ளத்தில் பதிந்துள்ளது.

2004 ஆம் ஆண்டில் திக்குவல்லை ஸப்வான் என்ற ஆசிரியரே முதன் முதலில் என்னைப் பற்றிய அறிமுகத்தை தினகரனின் இணைப்பிதழான செந்தூரத்தில் இடம்பெறச் செய்து, என்னை ஊக்கப்படுத்தினார்.

நீங்கள் இதுவரை எழுதி வெளியிட்ட நூல்கள் எவை? அவை, வாசகர்கள்; மத்தியில் எந்தளவு வரவேற்பைப் பெற்றுள்ளன?

இதுவரை நான் மொத்தமாகப் 13 நூல்களை நான் வெளியிட்டுள்ளேன். அதாவது தென்றலின் வேகம் (2010), எரிந்த சிறகுகள் (2015) என்ற இரண்டு கவிதை நூல்களை நான் வெளியிட்டுள்ளேன். அவை இளசுகளின் உள்ளங்களைக் கொள்ளை கொண்டுள்ளன. அவர்கள் ஒத்த மன நிலையில் கவிதைகளை வாசித்ததாகவும், ஒரே மூச்சாக புத்தகம் முழுவதையும் வாசித்து முடித்ததாகவும் கூறியதைக் கேட்டு மன நிறைவு கொண்டேன்.

கவிதைகளுடனான கை குலுக்கல் ஒரு பார்வை (2013) மற்றும் அறுவடைகள் (2015) என்ற இரண்டு நூல் விமர்சனங்கள் அடங்கிய நூல்களை நான் வெளியிட்டுள்ளேன். இந்த இரண்டு நூல்களைப் பற்றிச் சொல்லும் போது மூத்த எழுத்தாளர்கள் பலர் தங்களது நூல்களுக்கு, நானே நூல் விமர்சனம் எழுத வேண்டும் என்று விரும்பி, என்னிடமே அவர்களது நூல்களைத் தருகின்றார்கள். கிட்டத்தட்ட நான் இன்றுவரை எழுதிய நூல் விமர்சனங்கள் சுமார் 150 போல் இருக்கும். மூத்த எழுத்தாளர்கள் தொடக்கம் இளம் எழுத்தாளர்கள் வரை பாகுபாடின்றி நூல் விமர்சனங்களை எழுதியுள்ளேன். இத்துறையில் ஈடுபாடு காட்ட விரும்புபவர்கள் எனது நூல்களை வாசிப்பதன் மூலம் பல எழுத்தாளர்களது நூல்களை வாசித்த அனுபவத்தைப் பெற்றுக்கொள்ள முடியும்.

சிறுவர் இலக்கிய நூல்கள் பற்றிச் சொல்லும் போது எனது நான்கு சிறுவர் கதைகளடங்கிய நூல்களை ரூம் டு ரீட் நிறுவனம் பிரசுரித்து வெளியீடு செய்துள்ளது. அவை ஆடம்பரக் கூடு (2012), என்ன கொடுப்போம்? (2012), பாடல் கேட்ட குமார் (2013), இதுதான் சரியான வழி (2013) ஆகியனவாகும். கூடுதலாக இலங்கையின் நாலா புறங்களிலும் உள்ள கஷ்டப் பிரதேச பாடசாலைகள் சகலதிலும் எனது இந்த நூல்கள் மாணவர்களது வாசிப்புக்காக வைக்கப்பட்டுள்ளன. அதுபோல எனது சிறுவர் பாடல் நூலான வண்ணாத்திப் பூச்சி (2014) என்ற நூலை வெளியீடு செய்ய இலங்கை நூலக ஆவணவாக்கல் சபை அனுசரணை வழங்கியது. இந்த நூலை இலங்கைக் கல்வி அமைச்சின், நூல் அபிவிருத்தி சபையானது பாடசாலைகளுக்குப் பொருத்தமான நூலாக அங்கீகரித்துள்ளது.

விடியல் (2017) என்ற ஆய்வு நூலானது கொழும்புப் பல்கலைக்கழகத்தில் நான் இதழியல் கற்கும் போது சமர்ப்பித்த ஆய்வாக அமைகிறது. இந்த நூலைப் பல்கலைக்கழக மாணவர்கள் பலரும் என்னிடம் கேட்டு பார்வையிடுகின்றார்கள். ஒரு ஆய்வு நூல் எப்படியிருக்க வேண்டும் என்ற அறிமுகத்தை இந்த நூல் மூலம் அவர்கள் பெற்றுக்கொள்வதாக அறிந்து கொண்டேன்.

எனவே எந்த வகையான நூலாக இருந்தாலும் அவை பலருக்கும் பல வகைகளில் மிகுந்த பிரயோசனம் உடையதாக அமைய வேண்டும். இப்படியான நூல்கள் தான் காலத்தின் தேவையாக உள்ளது என்று நினைக்கின்றேன்.

"நூல் வெளியீடு" என்ற விடயத்தில் ஓரு படைப்பாளி சந்திக்கும் சவால்கள்?

நூல்களை வெளியிடுவது என்பது ஒரு எழுத்தாளன் தன் எதிர்காலத்தை அடகு வைப்பதற்கு ஒப்பானது. சுமார் 500 பிரதிகளை அச்சிடுவது என்றாலே 80,000 ரூபாவுக்கு மேல் செலவு காத்திருக்கின்றது. அதையும் தாண்டி நூல் வெளியீட்டுக்காகவும், மண்டப வாடகை, அழைப்பிதழ், இத்தியாதிகளுக்காகவும் ஒரு தொகை செலவு காத்திருக்கின்றது. காசு என்ற விடயத்தை ஒதுக்கி வைத்துவிட்டுப் பார்த்தால் விழாவுக்கு வருகை தருவோர் பற்றிய எண்ணம் பயத்தில் ஆழ்த்தி விடுகின்றது. இதுவும் அல்லாமல் அழைப்பிதழ்கள் இயற்கை அனர்த்தங்களில் அகப்பட்டு விழாவுக்குப் பின்னர் கிடைக்கக் கூடிய துரதிர்ஷ்ட வசமான சூழ்நிலையும் காணப்படுகின்றது. 

அத்துடன் அழைப்பிதழில் பெயர் குறிப்பிடப்படுபவர்களின் பட்டம் பதவிகள் குறிப்பிடப்படாத பட்சத்தில் குறிப்பிட்ட சிலர் விழாவுக்கே வருகை தரமாட்டார்கள். வேறு சிலர் அழைப்பிதழில் தனது பெயர் குறிப்பிடப்படவில்லை என்று வருகை தர மாட்டார்கள். தனக்கு பிடிக்காதவர்களின் பெயர் அழைப்பிதழில் இருந்தால் இன்னும் ஒரு வகையினர் நிகழ்வுக்கு வருகை தரமாட்டார்கள். இவ்வகையான சவால்களையெல்லாம் தாண்டி ஒரு நூல் வெளியீடு சிறப்பாக இடம்பெற்றால் அது அந்த எழுத்தாளனுக்குக் கிடைக்கும் மிகப் பெரிய அங்கீகாரமாகும்.

பூங்காவனம் சஞ்சிகை தொடங்க உந்துதலாய் அமைந்த விடயம் எது?

மல்லிகை, ஞானம் போன்ற சஞ்சிகை கள் அந்நாட்களில் மிகவும் பிரபல்யம் பெற்றவையாக இருந்தது. ஞானம் சஞ்சிகை எனக்கு அறிமுகமான புதிதில் மாதா, மாதம் ஒரு எழுத்தாரை அறிமுகப்படுத்தி, அவரது கவிதையையும் பிரசுரித்து வந்தது. அதில் எனது அறிமுகமும் எனது கவிதையும் பிரசுரமாகியது. அந்த மகிழ்ச்சியை இன்றும் அளவிட்டுச் சொல்ல முடியாது. எனக்குக் கிடைத்த மகிழ்ச்சியை எனது எழுத்தாள நண்பர்களுக்கும் வழங்கினேன். அதாவது அவர்கள் பற்றிய அறிமுகத்தையும், அவர்களது கவிதையையும் பிரசுரமாக நான் உதவியாக இருந்தேன்.

2004 ஆம் ஆண்டு தினமுரசுப் பத்திரிகையில் நிர்மூலம் என்ற எனது கவிதை பிரசுரமானதைத் தொடர்ந்து எழுத்துத் துறையில் 17 வருடங்களைக் கடந்து நின்றாலும் ஆரம்பத்தில் எனக்குக் கிடைத்த களங்கள் மிகவும் பெறுமதியானவை. அவையே என்னை ஊக்குவித்தன.

என்றாலும்  புதிய எழுத்தாளர் களுக்கு வாய்ப்புக் குறைவாக அமைந்ததைக் காணமுடிந்தது. அதன் விளைவால் 2010 ஆம் வருடம் பூங்காவனம் என்ற சஞ்சிகையைத் தொடங்கி அதில் மூத்த எழுத்தாளர்களின் படைப்புக்களையும் உள்வாங்கி, கூடுதலாகப் புதிய எழுத்தாளர்களுக்கும் களம் அமைத்துக் கொடுத்தேன்.

இப்படைப்புலகில் தனித்துவமாக சளைக்காமல் பயணிக்கும் தங்களின் வெற்றியின் ரகசியம் என்ன?

ஒரு கலைஞன், அல்லது கவிஞன் முதலில் மனிதனாக இருக்க வேண்டும். ஓவ்வொரு கலைஞனும் மனிதனை நேசிக்கக் கற்றுக்கொள்ள வேண்டும். மனிதாபிமானத்தோடு செயற்பட வேண்டும். நாம் உலகத்தில் பல செல்வங்களைச் சேமித்தாலும் மனிதர்களின் அன்பை, மதிப்பை சேமிக்காவிட்டால் நாம் வாழ்ந்த வாழ்க்கைக்கு அர்த்தம் இருக்காது. எனவே நான் நேசிக்கும் மக்களின் வாழ்வியல் பிரச்சினைகளை எமது எழுத்துக்களினூடாக பிரதிபலிக்கின்றபோது அது அவர்களுக்கு ஆறுதலாகவும் மற்றவர்களுக்கு பாடமாகவும் அமைந்து விடுகின்றது. 

நாம் எழுதும் படைப்புக்கள் நூலுருவாக்கம் பெற்றால்தான் அது காலத்தால் நிலைத்திருக்கும். ஆதனால் நான் எழுதும் படைப்புக்களை நூல்களாக வெளியிடுவதில் கரிசனை காட்டி வருகின்றேன். அவ்வாறு நூல்களை வெளியீடு செய்யும் போது அதனை வாசிப்பவர்கள் தொலைபேசியூடாகவும், மின்னஞ்சல் மூலமாகவும் என்னை வாழ்த்துகின்றார்கள். 

மேலும் எனது நூல்களை வெளியீடு செய்யும் போது ஏற்படுகின்ற பல சிக்கல்களையும் சவால்களையும் சமாளித்து அவற்றை சிரமமாக நினைக்காமல் பொறுத்துக்கொண்டு தொடர்ந்தும் வெளியிட்டு வருகின்றேன்.

எனது நூல் வெளியீடுகள் சிலவற்றின் முதற்பிரதிகளை இலக்கியப் புரவலர் ஹாசிம் உமர் அவர்கள் பெற்று என்னை ஊக்கப்படுத்தியுள்ளார். அதேபோன்று எனது நூல் வெளியீடுகளின் போது என்னையும், என் எழுத்துக்களையும் நேசிக்கும் நல்ல உள்ளங்கள் சிரமம் பாராமல் வருகை தந்து எனக்கு உதவிக் கரம் நீட்டுகிறார்கள். தவிர்க்க முடியாத காரணத்தால் என் புத்தக வெளியீட்டு நிகழ்வுகளுக்கு வருகை தர முடியாதவர்கள் கூட பிரிதொரு தினத்தில் என் நூல்களை வாங்கி உதவி செய்கின்றார்கள். 

பத்திரிகைகள், சஞ்சிகைகள், வலைத்தளங்கள், தொலைக்காட்சி, வானொலி போன்ற ஊடகங்களும் ஊடகவியலாளர்களும் எனது படைப்புக்களுக்கு களம் தந்து என்னை ஊக்குவிக்கின்றார்கள். இவ்வாறான சகல விடயங்களுமே எனது வெற்றிக்கான தூண்களாகும்.

இலக்கியம், பத்திரிகை தவிர, மற்ற துறைகளில் உங்களுக்கிருக்கும் ஆர்வம் பற்றி..?

கணக்கீட்டுத் துறையில் உயர் தரம் கற்றதால் கணக்கீட்டுத் துறையில் மிகுந்த ஈடுபாடு உண்டு. இந்த ஈடுபாட்டின் காரணமாக பாடசாலை மாணவர்களை நோக்கியதாக கணக்கீட்டுத் துறையில் மூன்று நூல்களை என்னால் வெளியிட முடிந்தது. இந்த நூல்கள் அந்தப் பாடத்தைக் கற்கும் மாணவர்களுக்கு ஒரு வரப்பிரவாதமாகவே அமைந்துள்ளன. அத்துடன் கொரோனாக் கால விடுமுறையில் அடிப்படைக் கணக்கீடு என்ற புதிய நூலொன்றையும் தயார் செய்தேன் இதனையும் விரைவில் வெளியிட முயற்சி செய்து கொண்டிருக்கின்றேன். நிச்சயமாக இந்த நூலும் கணக்கீடு பாடம் கற்கும் மாணவர்களுக்கு ஒரு வரப்பிரசாதமாக அமையும் என்பதில் எந்தவித ஐயமும் இல்லை.

உங்கள் வாழ்க்கையில் ரோல் மாடலாக நினைப்பது யாரை?

அவ்வாறு குறிப்பாக சொல்வதற்கு யாருமில்லை. ஒவ்வொரு விடயங்களிலும் பலதரப்பட்டவர்களை முன்னுதாரணமாகக் கொள்கின்றேன் அவ்வளவே. புதுக் கவிதைகளைப் பொறுத்தவரை கவிஞர் மு. மேத்தா அவர்களின் கவிதைப் பாணி எனக்கு மிகவும் பிடிக்கும். சிறுகதைகளைப் பொறுத்தவரை திக்குவல்லைக் கமால் அவர்களின் சிறுகதைகளின் உள்ளடக்கம் மற்றும் பேச்சு வழக்கு மிகவும் பிடிக்கும். நூல் விமர்சனங்களைப் பொறுத்தவரையில் கே.எஸ். சிவகுமாரன் அவர்களின் திறனாய்வுப் போக்கு மிகவும் பிடிக்கும். இப்படிச் சில துறைகளில் சிலரை முன்னுதாரணமாகக் கொள்கிறேன்.

மலையகத்தை பொறுத்தவரையில் எழுத்தாளர்களின் பங்களிப்பு, வளர்ச்சி, அவர்களுக்கு கிடைக்கும் சந்தர்ப்பங்கள் பற்றி கூறமுடியுமா?

மலையகத்தை சேர்ந்த எழுத்தாளர்கள் கொடி கட்டிப் பறக்கின்றார்கள். அவர்களின் ஆத்திரமெல்லாம் இன்று முன்னேற்றங்களாக மாறி வருவது ஆரோக்கியமானது. தலைநகரில் வீட்டு வேலைகளுக்காக ஒது(டு)க்கப்பட்டவர்கள் இன்று பல உயர் பதவிகளை வகிக்கின்றார்கள். மலையக எழுத்தாளர்களின் வளர்ச்சிக்காக பல மலையக அமைப்புக்கள் செயற்பட்டு வருகின்றன. அவை மலையக எழுத்தாளர்களுக்காக போட்டிகளை நடத்தி பரிசுகளை வழங்கி அவர்களை ஊக்குவிக்கின்றன.

இன்றைய பெண்கள் சமுதாயம் எதிர் நோக்கும் முக்கிய பிரச்சினை எது? உங்கள் பார்வையில் அதற்கான தீர்வு என்னவென நினைக்கிறீர்கள்?

தற்காலத்தைப் பொறுத்தவரை பொது வெளியில் பேசக் கூடிய அல்லது பேச வேண்டிய ஒரு விடயமாக பெண்கள், குழந்தைகளின் பாதுகாப்பு முக்கிய இடம்பெறுகிறது. குறிப்பாக தொழிலுக்குச் செல்லும் பெண்கள் பஸ்களிலும், அலுவலகத்திலும் மட்டமான சில ஆண்களின் பாலியல் துன்புறுத்தல்களுக்கு ஆளாக நேரிடுகின்றது. பலர் எதிர்த்தும் சிலர் வெளியே சொல்ல முடியாமல் கண்ணீரோடும் வாழ்கிறார்கள். குழந்தைகளைப் பொறுத்தளவில் சொந்த பந்தத்திலுள்ள சில ஆண்கள், சில ஸ்கூல் சேர்விஸ் சாரதி, சில ஆண் ஆசிரியர்கள் போன்றவர்களின் தகாத தொடுகைகளுக்கு உள்ளாகி சில குழந்தைகள் பெற்றோரிடம் சொல்லப் பயந்து ஒரு வகையான மன உளைச்சலுக்கு ஆளாகின்றார்கள்.

எனவே இவ்வாறான சந்தர்ப்பங்களில் பெண்கள் தைரியமாக தம் எதிர்ப்பைத் தெரிவிக்க வேண்டும். அலுவலகங்களில் தம் சக பெண் ஊழியர்களிடம் தமக்கு நடந்த அநீதியைத் தெரிவித்து அவர்களையும் பாதுகாக்க வேண்டும். அத்துடன் பெண் மேலதிகாரிகளிடமும் இதுபற்றி முறையிட வேண்டும். குழந்தைகளுக்கு ஷகுட் டச்|, ஷபேட் டச்| சொல்லிக்கொடுப்பதைவிட ஷடோன்ட் டச்| என்று சொல்லிக் கொடுங்கள். பெண் பிள்ளைகள் ஆண் நண்பர்களுடன் பழகுவதை பெற்றோர்கள் கண்டிப்பாக அவதானியுங்கள். மிக முக்கியமாக ஸ்மார்ட் போன்களை பிள்ளைகளுக்கு கொடுக்காதீர்கள். அதேபோன்று தற்காலத்தைப் பொறுத்தவரை பெண் பிள்ளைகளுக்குப் போன்றே ஆண் பிள்ளைகளின் பாதுகாப்புக்கும் முக்கியத்துவம் கொடுங்கள்.

எழுத்துத் துறையில் ஈடுபடும் பெண்களுக்கு நீங்கள் வழங்கும் ஆலோசனை என்ன?

பொதுவாக பெண்கள் என்று நோக்குமிடத்து தமது கலாசாரத்தை சீரழித்துக் கொண்டு யாரும் எழுத முன்வரக் கூடாது. ஏனெனில் நமது வாழ்க்கை பூஞ்சோலையில் ரோஜாக்கள் பூத்துக் கொண்டிருக்கும்போது நாம் எமது எழுத்துக்களினூடாக ஏன் முட்களைத் தேடிக்கொள்ள வேண்டும்? 

வரம்பு அல்லது வரைமுறைகள் என்பதெல்லாம் பெண்களை முடக்கிப் போடுபவை என்ற சிந்தனையிலிருந்து விடுபடுங்கள். உண்மையில் அந்த வரைமுறைகள் எமக்கு முன்னோர்கள் போட்டுவிட்ட முள்வேலி. முள்வேலியைப் பயிர்கள் கடந்தால் அவை காளைகளின் பசிக்கு இரையாக நேரிடும். எனவே எமக்கென்றொரு பாதையை நாம் போட்டுக்கொள்வதில் தவறில்லை. அதில் தனித்துவம் இருக்க வேண்டுமே தவிர ஒழுக்க வரைமுறைகளைத் தவறிவிடக் கூடாது.

இலக்கியத் துறையில் உங்களது நோக்கம் என்ன?

என் வாழ்வில் நான் கண்ட முதல் சோகம் 2003 இல் எனது தாயார் இறையடி சேர்ந்ததுதான். அதிலிருந்துதான் எனது இதயத்தின் ஓசைகளைப் பாஷைகளாக நான் மொழி பெயர்த்தேன். கவி வடித்தேன். அவ்வாறு எழுதும்போது எனது நோக்கம் என் துயரத்தை காகிதத்துக்கும் சுமக்கக் கொடுப்பதுதான். ஆனால் காலவோட்டத்தினால் கவிதையின், இலக்கியத்தின் போக்கு என் மனதில் ஒரு ஆறுதலையும் தேறுதலையும் தந்ததுண்மை. அந்த மாறுதலினால் என் சிந்தனை இலக்கியத்தில் சிக்கிக் கொண்டது. 

அதன் பின்னர் நான் கடந்து வந்த காலத்தில் பல சம்பவங்கள் எனக்கு படிப்பினையாக அமைந்தன. சிலரது வாழ்க்கை எனக்கு பாடமாக அமைந்தது. அவற்றையெல்லாம் அவதானித்து அந்தப் பிரச்சினைகளில் மற்றவர்கள் சிக்கிவிடக்கூடாது என்ற நோக்கத்திலும், யாரும் பாதிக்கப்பட்டு விடக்கூடாது என்ற நோக்கத்திலும் பேனா என்ற ஆயுதத்தை ஏந்தினேன். சமூகத்துக்கு எதிராகச் செயற்படும் விடயங்களுக்காக அந்தப் பேனாவை வாளாக மாற்றினேன். எனது நோக்கம் ஒரு படைப்பாளனின் எழுத்துக்கள் வாசிப்பவரின் இதயத்தைத் தொட வேண்டுமென்பதே தவிர சுட வேண்டும் என்பதல்ல.

நூற்றுக் கணக்கானவர்களை நீங்கள் பத்திரிகை, சஞ்சிகை, இணையத் தளங்கள் வாயிலாக நேர்காணல் செய்துள்ளீர்கள். உங்களது அறிமுகம் மற்றும் நேர்காணல்கள் ஊடகங்களில் வெளிவந்தது தொடர்பாகப் பகிர்ந்து கொள்ளலாமே?

திக்குவல்லை ஸப்வான் என்ற ஆசிரியரே முதன் முதலாக என்னைப் பற்றிய அறிமுகத்தை தினகரனின் இணைப்பிதழான செந்தூரத்தில் முதன் முதலில் (2004.07.04) இடம் பெறச் செய்து என்னை ஊக்கப்படுத்தினார். அதைத்தொடர்ந்து இன்றுவரை 25 க்கும் மேற்பட்ட நேர்காணல்கள் பத்திரிகைகள், சஞ்சிகைகள், வானொலி, தொலைக்காட்சிகளில் வந்துள்ளது. 

ஊவா சமூக வானொலியில் நெஞ்சம் மறப்பதில்லை நிகழ்ச்சியில் எனது நேர்காணல் ஒலிபரப்பப்பட்டுள்ளன. சுமார் நாற்பத்தைந்து நிமிடங்கள் ஒலிபரப்பான இந்த நேர்காணலை பாத்திமா ரிஸ்வானா செய்தார். இந்த நேர்காணல் மூலமே எனக்குத் தாராளமாகக் கருத்துக்களைப் பகிர்ந்துகொள்ள அவகாசம் கிடைத்தது.

பிரான்ஸிலிருந்து வெளிவரும் தமிழ் நெஞ்சம் சஞ்சிகையின் 2020 ஜுன் மாத இதழிலும் எனது நேர்காணல் வெளிவந்தது.

இலக்கியத் துறையில் உங்களால் மறக்க முடியாத சம்பவம்?

விருது வழங்கும் ஒரு தனியார் அமைப்பு, பத்திரிகைகளில் ஆய்வு நூல் மற்றும் மொழி பெயர்ப்பு நூல் போன்றவற்றுக்கு விருது கொடுப்பதாக தகவல் தந்து, நூல்களை அனுப்பி வைக்கும்படி கோரியிருந்தார்கள். அதற்கிணங்க நானும் எனது விடியல் நூலைக் குறிப்பிட்ட அமைப்புக்கு நேரில் கொண்டு போய்க் கொடுத்தேன். சில நாட்களில் தொடர்பாளர் எனக்கு தொலைபேசி அழைப்பை ஏற்படுத்தி ஒரு இலக்கிய நிகழ்வைக் குறிப்பிட்டு அதற்கு வருமாறும், நிகழ்வு முடிந்த பின்னர் விடியல் நூல் பற்றிக் கதைக்க வேண்டும் என்றும் குறிப்பிட்டார். அதன்படி நானும் குறிப்பிட்ட நிகழ்வுக்;குச் சென்றிருந்தேன்.

அந்த நிகழ்வு முடிவடைந்த பின்னர், தொடர்பாளர் என்னை ஒரு தனிப்பட்ட ரீதியாக நேர்காணல் செய்தார். இந்த நேர்காணலில் முழுக்க, முழுக்க எனது வருமானம், குடும்பப் பொருளாதார நிலைமை, தந்தையின் தொழில், ஆண் சகோதரர்களின் தொழில், அதிலும் வெளிநாட்டில் யாராவது குடும்பத்தவர்கள் வசிக்கின்றார்களா போன்ற கேள்விகள் முக்கிய பேசு பொருளாக அமைந்தன. அவர் எதிர்பார்த்த கேள்விகளில் அவருக்கு சாதகமாக எந்தப் பதிலும் அமையவில்லை.

நான் மிகவும் வறுமையான குடும்பத்திலிருந்து வந்தவள் எனும் உண்மையைச் சொன்னேன். அவரைப் பொறுத்தவரை அந்த நேர்காணலில் நான் தோல்வியடைந்தேன் என்று தான் சொல்ல வேண்டும். ஆகக் குறைந்தது அவரது பெயரை எனது விடியல் நூலில் குறிப்பிடவில்லை என்றும் கடிந்துகொண்டார்.

என்ன ஆச்சரியம் எனது விடியல் நூல் தேர்வுக் குழுவுக்கே போகவில்லை. இதுபற்றி மிகவும் உறுதியாகத் தெரிந்து கொண்ட நான், அவரிடம் எனது நூல் தொடர்பாக வினவினேன். அவர் மிகவும் காரசாரமாகப் பேசினார். உங்கள் நூலை தேர்வுக் குழுவுக்குப் அனுப்புவோம் அல்லது அனுப்பாமல் விடுவோம். அதனை முடிவு செய்வது நாங்கள். மட்டுமல்லாமல் நாங்கள் நினைத்தவர்களுக்குத்தான் விருதும் கொடுப்போம் என்று குறிப்பிட்டார். இதனை ஒரு கேள்வியாக கேட்டுக்கொண்டு நீங்கள் வருவது தான் சரியில்லை என்று கடுமையாகக் கடிந்துகொண்டார். 

அவர்கள் விரும்பியவர்களுக்கு விருதுகளைக் கொடுக்கட்டும். அதில் எந்தவிதமான பிரச்சினைகளும் இல்லை. ஏன் அதனைப் பத்திரிகையில் விளம்பரம் செய்து, பொதுமைப்படுத்திக் காட்டி, உலகை ஏமாற்றுகிறார்கள்? 

பின்னர் எனது இந்தப் பிரச்சினையை நான் அமைப்பின் தலைவருக்கு தெரியப்படுத்தினேன். அமைப்பின் தலைவரும், தொடர்பாளர் பேசியது போலவே என் கார், என் பெற்றோல், என் விருப்பம் என்ற அதிகாரத் தோரணையில்தான் பேசினார்.

சத்தியமாக எனக்கு விருது கிடைக்கவில்லை என்பது எனது கவலையல்ல. எனது நூல் தேர்வுக் குழுவுக்குப் போய், விருது கிடைக்காமல் இருந்தால் அது நியாயமானதே. அந்த நூல்களைத் தேர்ந்தெடுக்கும் நடுவர்கள் ஒருவரும் எனது நூலைக் கண்ணாலும் காணவில்லை என்பதுதான் எனது வருத்தம். இப்படியான ஒரு போலிக் கும்பலுக்கு எனது நூலைக் கொடுத்தேன் என்று நினைக்கையில்தான் கவலையாக இருக்கிறது.

நூல் தரமாக இல்லாவிட்டாலும் அவர்களுக்கு குறிப்பிட்ட நபரை ஏதோ ஒரு (பொருளாதார) காரணத்துக்காக பிடித்திருந்தால் விருது கொடுப்பார்கள். இப்படி விருதுகள் பற்றி பலரும் பலதையும் சொல்லக் கேள்விப்பட்டுள்ளேன். ஆனால் இந்த அனுபவம் எனக்குக் கிடைத்த ஒரு புதுமையான அனுபவம். இந்த நிகழ்வை என்னால் இன்றும் மறக்க முடியவில்லை.

இப்படித்தான் 2018 இல் முகநூல் நுட்(அற்)பமான குழுமமொன்று விழாவமைத்து எனக்கு ஷஷகலைப்பொழில்|| நுட்ப விருது தருவதாக அறிவித்து மூன்று மாதம் முகநூலில் பதிவுகள் போட்டு அமர்க்களப்படுத்தினார்கள். இவர்களை நம்பி பலரும் வெளிநாட்டிலிருந்தெல்லாம் வந்திருந்தார்கள். அவர்களிடம் நன்கொடையென்று சொல்லி பணம் எடுத்திருக்கிறார்கள். இறுதியில் விருது தயாரிப்பில் தாமதமாகி விட்டதென்று சொல்லி அவர்களைச் சமாளித்திருக்கிறார்கள். பெரும் செலவு செய்து இந்த விருது விழாவுக்காகவென்றே வெளிநாட்டிலிருந்து வந்தவர்கள் மிகவும் வேதனைப்பட்டதாக பின்னர் நான் கேள்விப்பட்டேன். 

ஆகக் குறைந்தது எனக்கு ஒரு அழைப்பிதழையாவது இவர்கள் அனுப்பி வைக்கவில்லை. மட்டுமல்லாமல் அந்த குழுவினர் எனக்கு எந்த விதமான விருதுகளையும் இதுவரை அனுப்பி வைக்கவில்லை. இப்படியான அமைப்புகள் பணத்தை மட்டுமே நோக்கமாகக் கொண்டு செயல்படுவது கேவலமாக இல்லையா? எனது பெயரை, எனது அனுமதியில்லாமல் பேஸ்புக்கில் விருது கொடுப்பதாகப் போட்டு, அவர்களது நிகழ்வை கௌரவப்படுத்திக்கொள்ளும் அவர்கள் இனியாவது திருத்திக்கொள்ள வேண்டும்.

நீங்கள் இதுவரை சாதித்ததும், சாதிக்க நினைப்பதும்?

2010 இல் பூங்காவனம் இலக்கிய வட்டத்தை நிறுவி, அதன் மூலம் இதுவரை 37 பூங்காவனம் காலாண்டு சஞ்சிகைகளைத் தொடர்ச்சியாக வெளியிட்டிருப்பதைப் பெரும் சாதனையாகவே நினைக்கின்றேன். ஏன் என்றால் ஒரு பெண்ணாக இருந்து கொண்டு விளம்பரங்களைத் தேடுவதிலுள்ள சிக்கல், ஆக்கங்களைக் குறிப்பிட்ட காலத்துக்குள் தட்டச்சு செய்து கொள்வது, அச்சகங்களின் தாமதம் போன்றவற்றைத் தாண்டி குறிப்பிட்ட காலத்துக்குள் சஞ்சிகையை வெளியிடுவது ஒன்றும் அவ்வளவு இலேசான காரியமல்ல. எனவே அதை நான் சீராக வெளியிட்டு வருவதே ஒரு சாதனை என்றுதான் எண்ணத் தோன்றுகின்றது.

ஒரே துறையில் அல்லாது கவிதை, சிறுகதை, நூல் விமர்சனம், சிறுவர் இலக்கியம், ஆய்வு போன்ற பல தளங்களிலும் இலக்கியம் படைப்பதோடு மேலதிகமாக கணக்கீட்டுத் துறையையும் இணைத்து இதுவரை 13 நூல்களை வெளியிட்டிருப்பதும் என்னைப் பொறுத்த அளவில் ஒரு சாதனையாகவே நினைக்கிறேன்.

கணினி வடிவமைப்பும் முழுமையாக செய்த நிலையில் அச்சுக்குத் தயாராக இருக்கும் இன்னும் 5 நூல்களை எதிர்காலத்தில் ஒவ்வொன்றாக வெளியிட வேண்டும்.

ஊடகத் துறையிலும், இலக்கியத் துறையிலும் கால் பதிக்க ஆர்வத்துடன் காத்திருக்கும் பெண்களுக்கு நீங்கள் சொல்ல விரும்புவது?

இலக்கியம் என்பது ஒரு அழகான பூஞ்சோலை. அதிலே பலர் தேனெடுத்துக் கொண்டிருப்பார்கள். சிலரோ அப்பூஞ்சோலையை அழிக்க வாளெடுத்துக் கொண்டிருப்பார்கள். இலக்கியத் துறையில் சாதிப்பதற்கு பலர் எமக்கு கைகொடுத்தாலும் சில நேரங்களில் வெட்டுக் கொத்துக்கள் நிறைய இடம் பெறும். முதலில் அவற்றை எதிர்கொள்ள தைரியம் வேண்டும். அவ்வாறானவர்களைக் கண்டு ஒதுங்கி விடாமல் தன் முயற்சியில் உறுதியாக நிற்க வேண்டும். சமூகத்திற்காக தான் சொல்ல வந்ததை துணிவோடும் உளத் தூய்மையோடும் படைப்பாக்கம் செய்வதில் உறுதியாக நின்று முன்னேற வேண்டும்.

உங்கள் இலக்கியப் (இலட்சியப்) பயணம், மேலும் சாதனைகளுடன் தடம் பதித்து, வெற்றிவாகை சூட, செந்தூரம் இதழ் சார்பாக எம் இனிய வாழ்த்துக்களைக் கூறிக்கொள்கிறோம். 

- கலைஞர் கே. ஈஸ்வரலிங்கம்